Каһарман дип эзләрләр әле...

Галимнәрдән академик Индус Таһиров, ТР Фәннәр академиясенең Тарих институты директоры Рафаил Хәкимов, ТР Дәүләт Советы депутаты Разил Вәлиев, шагыйрь Марсель Галиев, артист Әзһәр Шакиров, Бөтендөнья татар конгрессы Башкарма комитеты рәисенең беренче урынбасары Данис Шакиров, галим Дамир Исхаков һәм башкалар чыгыш ясады. Артист халкы да җырга-моңга күмде залды. Сара Садыйкова һәм Гөлшат Зәйнашева исемнәре дә рәхмәткә күмелде.

Кичә бик матур гына узды. Залда урта яшьләрдән узып баручы ир-атлар һәм хатын-кызлар күп иде. 90 нчы елларда урамнар тутырып йөргән буын юклар иде, бик азлар иде.

Мин кичә буе 90 нчы еллар хатирәсенә уралып утырдым. Халык исеменнән бер генә чыгыш та булмавы эчемне пошыра.

Ә хатирәләр күңелдә бар әле. Урамнар тулы элмә такталар, әдәп-әхлаксыз сурәтләр, әхлакны җимерә торган телефон номерлары баскан иде Казанны. Безнең “Мөслимә” оешмасы моңа каршы чыкты, хатлар язды, радио-телевидениедә чыгышлар ясады. Моны Фәндәс Сафиуллин ишетеп, берничә депутат белән автобуста Казанны әйләнгәннәр. Нәтиҗәдә 70 элмә тактасын алдырдык. Мин бу хакта Ф.Сафиуллинның халык белән тыгыз эшләгәнен әйтмәкче идем. Хәер, баруга үзебезнең телевидениегә сөйләдем. Белмим, күрсәтерләрме-юкмы. Әмма Ф.Сафиуллин гасырыбыз каһарманы булып кала. Әлеге җыелышларны яшьләр, шәкертләр арасында үткәрү отышлы булачак, иншаллаһ! Фәндәс Шакир улы милләтебезнең әхлагын, бозыкларсыз, акыллы, белемле, югары мәдәниятле булуын тели. Хәерле сәламәтлек, хәерле гомер телибез, гасыр каһарманы Фәндәс Сафиуллин.

Җәмәгать эшлеклесе Әлмира Һәдия.