Кулаткы укулары узды

Бишенче Кулаты укулары татар мәхәлләсен оештыруга багышланды.Ульяновск өлкәсе Кулаткы районында 100% татар яши. Бу Русиядәге саф татар районы.

Җыенны Үзәк Дини идарәнең Ульян мөфтияте оештырды. Мөфти Сәүбән Закиров милләтне, динне саклауга багышланган чараларны даими оештырып тора. Укуларның дәрәҗәсен анда катнашкан кунакларның күплеге күрсәтеп тора. Кулатка укулары Баш мөфти Тәлгат Таҗетдин, Үзәк Дини идарәнең баш казые Вәгыйз Яруллин, Дәүләт Советы депутаты, татар конгрессының Казан бүлеге җитәкчесе Фәрит Мифтахов, Татарстан казые Җәлил Фазлыев, Казанның 1000 еллык мәдрәсәсе ректоры Ильяс Җиһаншин, Чуашстанның «Гөлстан» мәдрәсәсе ректоры, мөфти урынбасары Наил Җамалетдин һәм башкалар катнашты.

Фәрит Мифтахов «Ислам һәм татар дөньясы» концепциясе турында чыгыш ясады. Бу уңайдан фәнни җыеннар оештыру, аңа үзгәрешлшәр кертелү, шәһәр мәхәлләсе турында белдерде.

- Кулаткы укуларын уздырып, биредә җитди проблемалар күтәрү, аларны хәл итү юлларын эзләү, динебез һәм милләтебез үсеше турында фикер алышу Ульян татарларының ныклы позициядә булуын күрсәтә.

Яңа гасыр татар-мөселман милләтенә яңа таләпләр куя. Моннан йөз ел элек татар милләте белән ислам дине бербөтен, ягъни аерылмас булган. Ләкин 1990 еллардан соң динебезгә традицион булмаган агымнар килеп керү аркасында татар факторын читкә тибү галәмәте башланды. Бүген Аллага шөкер татар факторының әһәмиятен аңлау башланды. Чөнки татарлыктан башка традицион исламны үстереп булмый. Ә инде Русиядә ислам динен татар факторыннан башка саклау да авыр. Татар мәхәлләсе — ул традицион исламның зур бер өлеше-, диде Фәрит Мифтахов.

Ахырда кунаклар ишан Хабибулла Хансаваров каберен зиярат итте.

Тимер Сәгыйтов