Тынычлык бистәсендә – спорт уеннары

Кичә Казанның Тынычлык бистәсендәге “Динамо” спорт базасында мөселман яшьләре арасында Татарстан Ислам мәдәнияте үзәге тарафыннан волейбол, өстәл теннисы, 100 метрга 4 кешелек эстафета һәм интеллектуаль уеннар оештырылды. Анда Казанның РИУ, Татарстан Ислам мәдәнияте үзәге, Гарәбстан студентлары, Буа, чаллы, Яшел Үзән калалары, “Ярдәм” мәчете командалары үзара көч сынашты.

Бу ярышларның максаты һәм бурычлары мөселман яшьәре арасында дуслыкны ныгыту, әлеге уеннарны тагын да популярлаштыру һәм үстерүдән гыйбарәт. Ярышлар РИУ шәкерте Ильяс хәзрәт Сабировның Коръән укуы белән башланды.

Волейболда беренчелекне – РИУ, өстәл теннисында - “Ярдәм” мәчете, эстафетада – Чаллы, интеллектуаль уенда Ислам мәдәнияте үзәге спортчылары алды. Бу уеннарда җиңүчеләр мактау грамоталары, медальләр, акчалата бүләкләр белән бүләкләнде.

Өстәл теннисында “Ярдәм” мәчете мәхәлләсе вәкиле, керәшен егете Павел Галанов чемпион калды. Павел Мамадыш шәһәрендә туып үсә, өстәл теннисы буенча спорт мастерлыгына кандидат. Быел Идел буе физик культурасы, спорты һәм туризмы академиясен тәмамлый. Магистратурада укырга калырга ниятли.