Хаҗ кылу - олуг гыйбадәтләрнең берседер

Хаҗ – ислам нигезен тәшкил иткән олуг гыйбадәтләрнең берседер. Мөселманнарның Мәккәгә барып, шәригать кушканча билгеле бер гыйбадәтләрне үтәве, Кәгъбәтулланы зиярәт кылуы изге хаҗ гамәле була. Киләсе 2015 елда булачак хаҗ гамәлләренә исә Милади буенча 300 көн калган.

Татарстаннан хаҗ сәфәре оештыру белән шөгыльләнә торган “ДУМ РТ Хадж”ның рәсми сайты dumrt-haj.ru шул хакта искәртеп, хаҗ чыгымнары бәясен урнаштырган. Россия акчасында билгеләнгән ул сумма үзгәрергә мөмкин, дип аңлаттылар. Хәзерге вакытта “тизләтелгән”, “стандарт” рәвешлесенә 4,3 мең АКШ доллары кадәр сумма билгеләнгән, ә “эконом” дигәненә – 3,9 мең доллар (димәк, доллар бәясе рубльгә карата үзгәрсә, Россия акча берәмлегендәге сумма да үзгәрә). Аның беренчесе хаҗ кылучы өчен уңайлырак шартларда була, мисалга, самолетта туры рейс башкарыла, тору урыны “3 йолдызлы” кунакханәләрдә каралган, икенчесендә башка ил аша, ягъни өченче бер илдә башка самолетка күчеп очасы, яшәү урыннары да - “хаҗилар йорты”нда (бүлмәләрендә берьюлы дистәләп кеше яши).

Казанның хәләл рестораннарының берсендә "ДУМ РТ Хадж" программасы тәкъдим ителде, анда яңа сезон мөмкинлекләре, шартлары турында аңлатма бирелде. Хаҗны оештырганда изге сәфәргә баручыларның барлык теләкләре күздә тотыла. Киң катлам халыкка, хаҗ сәфәрен кулай бәядән һәм югары сыйфат белән оештыру максатыннан, “ДУМ РТ ХАДЖ” программасы елдан-ел камилләшә бара. Хаҗ программасы Россия Хаҗ шурасы стандартларына туры килә: ул җиренә җиткереп эшләнүе һәм ышанычлы булуы белән абруй казанды.

2014 елда изге сәфәр кылган дин кардәшләребез, хаҗны оештыруда катнашучылар сүзләренә таянып, быелгы хаҗ, Раббыбыз ярдәме белән, югары дәрәҗәдә узды дияргә була. Барлык хаҗилар да изге гамәлләрен Әбү Хәнифә мәзһәбе буенча үтәп, сау-сәләмәт өйләренә кайтты. Быелгы хаҗ сәфәрендә дин кардәшләребездән торган 45 төркем оештырылган иде. Хаҗны 21 көнгә исәпләнгән стандарт программа буенча һәм 14 көнгә каралган кыскартылган программа буенча үтәү мөмкинлеге булды. “ДУМ РТ ХАДЖ” программасы Согуд Гарәбстаны Хаҗ министрлыгының бүлекчәсе белән хезмәттәшлек итүче Россиядә бердәнбер хаҗ операторы булып тора. Безнең Татарстан хаҗ операторының эше Согуд Гарәбстаны ягыннан да югары бәяләнде, дип аңлаттылар әлеге оешмада.
Чыганак: "Татар-информ"