Илдус Фәизев мөфтилектән китте

Бүген Татарстан МДН пленумында мөфти Илдус хәзрәт Фәизев, сәламәтлеге начараю сәбәпле, үз вазифасыннан китте. Аның беренче урынбасары Абдулла хәзрәт Әдһәмев шулай ук вазифасын үтәүдән туктады.

ТҖ МДНнең нәшрият бүлеген җитәкләгән һәм Казандагы "Тынычлык” бистәсенең имамы Камил хәзрәт Сәмигуллин Татарстан мөфтие вазифасын башкарачак.

Исегезгә төшерәбез: узган елның 19 июнендә аягы яралангач, Илдус Фәизев озак вакытка сузылган дәвалану курсы узды, шуңа күрә үз вазифасын тулысынча үти алмады. Бу вакытта аның вазифасын урынбасары Абдулла хәзрәт Әдһәмев башкарды.

Хәзер исә Татарстан мөселманнары корылтаена кадәр ТҖ МДН белән Россия һәм Төркия мөселман уку йортларында белем алган 28 яшьлек Камил хәзрәт җитәкчелек кылачак.

Шулай ук пленумда ТҖ МДН рәисе вазифасына 10 көн эчендә гариза бирергә мөмкин булуы ачыкланды.

Татарстан Президенты Рөстәм Миңнеханов Илдус Фәизевкә уңай карашта булуы турында әйтте һәм аның кискен агымнарга каршы көрәшүен яхшы яктан бәяләде. Аның сүзләренчә, И. Фәизев хәзер фән һәм мәгариф эшләре белән шөгыльләнәчәк.

"Кем мөфти булыр – анысын имамнар хәл итәчәк”,-дип өстәде ахырдан Татарстан Президенты.