Гыйлемленең күңеле нур булыр

Менә тагын җөмһүриятебез көне җитте һәм узып та китте. Без дә, «Мөслимә» иҗтимагый оешмасы вәкилләре дә, Кабан күле буендагы «Шәкертләр мәйданы»нда инде 15 нче мәртәбә Мөселманнар җыенын үткәрдек.

Безнең якын ярдәмчебез - “Мәрҗани” мәчете имам-хатибы, Казан каласы мөселманнарының баш мөхтәсибе һәм Ислам көллияте җитәкчесе Мансур хәзрәт Җәләлетдин.

Алдагы көндә ишле булып яңгыр яуганлыктан, Мөселманнар җыенын мәчет чатырында үткәрербез, дип ниятләп куйган идек. Аллага шөкер, безгә елмаеп, кояш чыкты. Җыеныбызны бик гүзәл итеп үткәрдек. Зыялылар, депутатлар, галим-галимәләр мәйданыбызны һәм зиһеннәребезне бизәде. Гасыр абыстае, остазыбыз Рәшидә абыстай - үзе бер галәм. Ул бирегә килүчеләрне котлады, үзенең күркәм вәгазь-нәсихәтләрен җиткерде.

Халкыбыз безне ярата, үз итә, шөкер. Үрнәк алырлык мизгелләр бар бездә. “Ярдәм” мәчетендә Коръән өйрәнүче оланнарның мөнәҗәт әйтүләре, күрмәүче Гыймран Чебугаевның изге китаптан сүрәләр укуы мәйданны әсир итте. Аларның моңлы авазы кунаклар күңеленә иман нуры булып ягылды. Монда остазлар, остазбикәләр, балалар, шәкертләр үз сүзен мәйданга ирештерде.

Балык Бистәсе гармунчылары мәйданыбызга килеп, Кабан күле буен моңга күмде. Аллаһының рәхмәтләре яусын аларга!
Җыеныбызның исеме “Рухи мирас варислары” дип аталган иде. Әнсар хәзрәтнең Коръән укуы илә башланган җыен “Зыялылар клубы”ның танылган галимәсе, тарих фәннәре кандидаты, берничә китап авторы Тәэминә Биктимерованың иҗаты белән дәвам итте. Бирегә шулай ук халкыбызның киләчәге хакында уйланучы галим-галимәләр үз фикерләрен җиткерде. Бергәләп, халкыбызның рухи мирасын түкми-чәчми яшь буынга ирештерергә тиешлегебез ассызыкланды.

Аннары киләсе елда, Аллаһы боерса, барлык ак әбиләрне, дәү әниләрне оныклары белән бергә бирегә чакырачакбыз. Шулай эшләгәндә, беребезнең дә яшәве исраф булмас, иншә Аллаһ. Оныкларыбызны гыйлемлелек, әдәп-әхлак мисалында тәрбияләсәк, барчаларыбызның күңелендә нур булыр, иншә Аллаһ!

Әлмира ҺӘДИЯ, җәмәгать эшлеклесе