Гыйлемебезне арттырыйк!

Безнең “Ярдәм” мәчетендәге "Зур Казан" типографиясендә киләсе ел өчен календарь басылып чыкты. Аның һәр битеннән еллык, көндәлек яшәү хәятебезгә кирәкле мәгълүмат алырга мөмкин. Иң мөһиме – 2016 елдагы дини бәйрәмнәр вакыты күрсәтелгән.

Коръәндәге пәйгамбәрләрнең догалары һәм зикерләре бирелгән. Адәм һәм Һәва анабызның догалары да бар. Кешелек җәмгыятенә хакыйкатьне аңлатучы ислам динебезнең хикмәтләрен укып, күреп, акыл җыярсыз.

Календарьда Аллаһының исемнәре белән төрле авырулардан котылу, өшкерү юллары да күрсәтелгән, анда яшәешебездәге һәр очрактан ярдәмче догалар бар. Тормышыбызда шатлык-сөенечләр дә, кайгы-хәсрәтләр дә очрый. Кылган эш-гамәлләребезгә, бик үк уңай булмаганнарына тәүбә итә дә белергә тиешбез. Авырсак, чирне шифа сорап дәвалау мөмкинлеген дә без бу календарьда укып белә алабыз. Тик моңа аеруча сак мөнәсәбәттә булуыбыз сорала.

Тәкъвимдә “Ярдәм” мәчете имам-хатибы Илдар хәзрәт Баязитовның язмалары уйландыра һәм акылга файдалы мәгълүматлар өстәлә. Татарстан Республикасы мөфтие Камил хәзрәт Сәмигуллин, Мәскәү Диния нәзарәтеннән Әлбир хәзрәт Крганов, баш казый Җәлил хәзрәт Фазлыев, Пензадан Габдерәүф хәзрәт Зәбиров, язучы Солтан Шәмси, мәгърифәтче Мәгариф Раяновның чыгышларын уйлап, фикергә анализ ясауга юнәләсең.

Календарьда шулай ук ишетмәүчеләр һәм күрмәүче мөселманнар белән фидакарьләрчә эшләүче Мәликә Рәфкать кызы Гыйльметдинова хакында укып хозурланырсыз һәм сокланырсыз.

Мәгълүм авторыбыз Мәгариф Раяновның ислам динен кабул иткән немец галиме Вильфрид Хофман хакындагы язмада мөселманнар тормышы планетар яңгыраш ала.

Укыгыз, җәмәгать, үкенмәссез. Киләсе елдагы дини бәйрәмнәрне белү, ураза турындагы мәгълүматлар зиһенегезне баетыр, иншә Аллаһ! Календарьне төзүче Хатыйп Гәрәйгә һәм компьютер битләренә салучы Ильяс Гарифуллинга Аллаһының рәхмәтләре яусын! Календарьне башкалабыз Казанның Серов урамындагы 4 а йортына, ягъни андагы «Ярдәм” мәчетенә килеп алырга мөмкин.

Әлмира ҺӘДИЯ, җәмәгать эшлеклесе, “Ярдәм” мәчете