Бразилиянең футбол тренеры ялга җибәрелде

RIA.RU дан алынган мәгълүматларга караганда, Бразилиянең футбол җыелма командасы тренеры Сколари үз вазифасыннан җибәрелде.

Бразилия футбол конфедерациясе Сколарины һәм тренерлар штабының башка әгъзаларын, шулай ук техник директор Карлос Альберто Паррейраны ялга җибәрү турында карар кабул итте.

Globo агентлыгы хәбәреннән күренгәнчә, Бразилия футбол командасы дөнья беренчелегендә бары тик дүртенче урынны алгач, баш тренер Луис Фелипе Сколари үз вазифасыннан киткән.

Голландия командасына 0:3 исәбенә оттырып, чемпионатта дүртенче урынны алганнан соң, Сколари матбугат конференциясе вакытында аның язмышын Бразилия футбол конфедерациясе (CBF) хәл итәчәк дип белдергән иде. Һәм менә CDF тренерларны эштән җибәрү турында карар кабул иткән.

Бразилиялеләр булачак чемпионнарга – Германия командасына 1:7 исәбенә оттырдылар. Мондый хоккей исәбе аларга (тренерларга) кыйммәткә төште: остазларны эштән җибәрделәр. Җитмәсә, чүп өстенә чүмәлә дигәндәй, алар 3 нче урын өчен барган уенда голландиялеләргә 3:0 исәбенә җиңелгәч, эшләре бөтенләй дә хөртигә әйләнде. Бу ике тапкыр рәттән оттыру аркасында алар тренерлык вазифасыннан азат ителде.

Моңа кадәр Бразилия җыелма командагы 20 дөнья чемпионатында катнашып, шуларның бары берсендә генә зур исәпкә оттырды. 1998 елда Бразилия командасы дөнья чемпионаты финалында 3:0 исәбенә Франция футболчыларына отылган иде.