Бүген КФУда Эксперт Шурасы төзелде

Бүген Казан (Идел буе) федераль университетында иҗтимагый-сәяси һәм этноконфессиональ мәсьәләләр буенча Эксперт Шурасы төзелде. Әлеге Шура Татарстандагы иҗтимагый-сәяси һәм этноконфессиональ хәлне объектив вә бөтен яклап өйрәнү максатында оештырылды.

Бу Советның төп бурычы - Татарстандагы иҗтимагый-сәяси, милли, дини торышны тикшерү; дәүләтнең милли сәясәтен тормышка ашырганда бердәм фикер барлыкка китерү; Татарстандагы дини мөнәсәбәтләрнең торышы; республиканың иҗтимагый-сәяси һәм этноконфессиональ хәле мониторингында катнашу һәм башкалардан гыйбарәт.

Эксперт Шурасы мондый 4 төркем юнәлешләрендә: иҗтимагый-сәяси, милли, ислам һәм православие мәсьәләләре буенча барлыкка киләчәк.

Эксперт Шурага 35 кеше керә. Ислам дине экспертлары 10 кеше булачак. Ислам буенча экспертлар булып Россия ислам институты ректоры Мөхәммәтшин Рәфыйк Мөхәммәтша улы; Татарстан мөфтиенең беренче урынбасары Батров Рөстәм Гаяр улы; Татарстан мөфтие урынбасары, Казандагы “Ярдәм” мәчете имам-хатибы Баязитов Илдар Рәфкать улы; РИИның халыкара бүлек җитәкчесе Нургалиев Рөстәм Марат улы; Коръән һәм сөннәт үзәге җитәкчесе Салман Фәрит хәзрәт һәм башкалар керде.

Әлеге Шура белән Татарстан Президенты аппараты башлыгы урынбасары-эчке сәясәт мәсьәләләре буенча Татарстан Президенты Департаменты җитәкчесе Терентьев Александр Михайлович идарә итәчәк.