![](/_pu/189/13046025.jpg)
Татарстан мөфтиенең территорияләр (мөхтәсибәтләр) белән эшләү буенча урынбасары Мансур хәзрәт Җәләлетдинов Әлки районына эшлекле сәфәр кылды. Район имамнары, Әлки районы имам-мөхтәсибе Ирек хәзрәт Сәлахиев, Әлки муниципаль районы Советы рәисе урынбасары Рәшит Билалов һәм мәчетләр язмышына битараф булмаган кайбер авыл җирлеге башлыклары катнашында район мәхәлләләрен юридик теркәү уздыру мәсьәләләре буенча җыелыш узды.
Татарстан мөфтие урынбасары Мансур хәзрәт сүзләренчә, Диния нәзарәтендә иске мәчетләрне дә, яңа мәчетләрне дә теркәү барышы аерым контрольгә алынган. Ел дәвамында республиканың барлык мөхтәсибәтләрендә дә мәхәлләләрнең Россия Федерациясе законнарында билгеләнгән юридик теркәү таләпләре буенча тикшерүләр узачак. Әлеге эш белән мәчет төзелеше алып барганда ук шөгыльләнергә кирәклеге дә аерым әйтелде. Моннан тыш кадрлар составына, аерым алганда, имамнарның белеменә, мөгаллимнәрнең квалификациясенә, дини әдәбият белән тәэмин ителешкә игътибар юнәлтү зарурлыгы да ассызыклап үтелде дип хәбәр итә мөфтиятнең матбугат хезмәте.