Казанда аерылышучылар саны кимегән

Казанның 100 дән артык пары ТР Дәүләт хезмәте порталы аша ЗАГСка гаиләләрен теркәү буенча электрон рәвештә гариза биргән. ЗАГСка бармый гына гариза тапшыру хезмәте, Казаннан тыш, бары Мәскәүдә генә күрсәтелә.

2015 елда Татарстан башкаласында 12 мең 495 гаилә корылган. 2014 ел белән чагыштырганда, әлеге сан 3 процентка азрак.

“Бу 1990 елларда туган балаларның гаилә кора башлавы белән бәйле. Ул чорда Россия буйлап балалар туу кимегән иде. Аерылышучылар саны 4678, ягъни, 2014 ел белән чагыштырганда, 7,5 процентка азрак”, - дип белдерде бүген Казан каласы җитәкчеләренең “эшлекле дүшәмбе” киңәшмәсендә Татарстан башкаласы ЗАГС идарәсе җитәкчесе Гүзәл Габбасова. Аның сүзләренчә, туу турында таныклыкларның 63 проценты балалар тудыру йортларында тапшырылган - бу 15 меңләп документ дигән сүз.

ЗАГСның күп хезмәтләре хәзер күп функцияле үзәкләрдә күрсәтелә. “Районнарда ЗАГС бүлекләре бетерелү сәбәпле, гражданнарга документлар алу өчен әлеге үзәкләр бик җайлы”, - дип ассызыклады Г. Габбасова.

ЗАГС идарәсе җитәкчесе хәбәр иткәнчә, быел Казанның Киров районындагы ЗАГС бүлеген төзекләндерүне тәмамлау ниятләнә. Ул заманчарак булачак һәм барлык таләпләргә дә туры китерелеп эшләнәчәк.
“Татар-информ”