Кавказдан килгәннәр белемгә омтыла

Кичә Казандагы «Сөләйман» мәчетенә Чечен һәм Ингушетия республикаларыннан күзләре күрмәүче мөселманнар дин гыйлеме алырга килде. Бу юлы аларның саны да шактый ишле – 8 кешедән тора. Тик безне иң гаҗәпләндергәне бу түгел, алар ерак Кавказ якларыннан килүгә карамастан, ял итеп алырга уйламадылар. Аларның Хәмзә Алмасханов, Хәвәш Оздуев дигән кардәшләре исә "Происхождение Пророка Мухаммада» дигән китапның Брайльчәсен кулларына алып укый да башладылар.

Алай гына да түгел, уку-укыту бүлеге мөдире Мәликә ханым Гыйльметдиновадан үзләренә белем бирергә керешүен сорадылар. Мәликә ханымга исә аларга дәресләрнең 11 марттан башланачагы турында аңлатырга туры килде. Ник дигәндә, әле күзләре күрмәүчеләрнең барысы да килеп җитмәде. Аларга тагын Дагыстан, Башкортстан, Татарстанның төрле төбәкләреннән һәм, әлбәттә, Казан районнарыннан килеп, Брайльчә Коръән укырга өйрәнүче шәкертләр кушылыр, дип көтелә. Бу юлы ирләр төркемендә ике дистә кеше белем алачак. Алар арасында Чечняда күзләре күрмәүчеләр өчен үткәрелгән тәүге Коръән бәйгесендә өченче урынны алган кеше дә бар. Ул - Ибраһим Балаев.

"Яшерен-батырын түгел, Кавказдан килүче мөселманнарның барысы да диярлек намаз укый белә. Алар бик тырыш халык һәм белемгә омтыла. Шулай ук күбесе Брайль хәрефләре белән русча язмаларны да укый ала. Без аларга хәзер күбрәк сүрәләр ятлатырга, Коръәнне тәҗвид кагыйдәләре белән дөрес итеп укырга өйрәтәчәкбез, сира дәресләрен бирергә уйлыйбыз”,-диде Мәликә абыстай.

Хатыйп ГӘРӘЙ фотохәбәре