«Мөхәммәд Пәйгамбәр — ике дөнья рәхмәте» Бөтенроссия бәйгесе тәмамланды

«Мөхәммәд Пәйгамбәр — ике дөнья рәхмәте» Бөтенроссия бәйгесе тәмамланды. Аны Россия Мөфтиләр Шурасының Социаль-хәйрия һәм рухи-мәгърифәтчелек департаменты оештырган иде.

Шигъри бәйгедә җиңүчеләрне Россия Мөфтиләр Шурасының конференция залында котладылар. Әлеге тантаналы чарада мөфти шәех Равил хәзрәт Гайнетдин да катнашты, дип хәбәр итә Мөфтиләр советы сайты.

Быел конкурска 89 эш, шул исәптән 11 татарча әсәр килгән. Бәйгенең географиясе елдан-ел киңәя бара: агымдагы елда Вологда, Саратов, Төмән, Оренбург өлкәләре, Пермь һәм Приморье крайлары, Себер һәм Ерак Көнчыгыш төбәкләре, шулай ук Мәскәү, Татарстан, Башкортостан һәм Төньяк Кавказ Республикалары активлык күрсәткән.

Мәртәбәле жюри беренче урынны «Мөхәммәд Пәйгамбәрнең балачагыннан бер көн» поэмасы өчен Мәскәүдән Тимур Зөлфикаровка биргән. Икенче һәм өченче урыннарны Төмән өлкәсеннән Илдар Әхәтов һәм Мәскәүдән Наилә Шахмәмәтова бүлеште.

Җиңүчеләр арасында Татарстан вәкиле дә бар. «Татар телендәге иң яхшы шигырь» номинациясендә «Сәхабәләр килгән Болгарга» әсәре белән Татарстанның Яшел Үзән районының Мулла Иле авылыннан Равил Сәйфетдинов җиңү яулады. Ул 2005 елдан бирле Мулла Иле авылы имам-хатыйбы вазифаларын башкара.

Чыганак: «Татар-информ»