Алия Иксанова-Җәлил бүләге иясе

Илдар Халиков 2011 елда Эрзурумда узган уеннарда җиңү яулаган Алия Иксанова өчен өстәмә бүләк булдыру турындагы үтенечне хуплады.

14 февральдә ТР Министрлар Кабинетының М.Җәлил исемендәге Республика премиясен бирү турындагы карары имзаланды.

ТР Хөкүмәте башлыгы Илдар Халиков М.Җәлил исемендәге Республика премиясен бирү комитетының 2011 елда Эрзурумда узган XXV Бөтендөнья кышкы универсиадасында җиңү яулаган Түбән Кама чаңгычысы Алия Иксанова өчен өстәмә бүләк булдыру турындагы үтенечен хуплады.

Искәртеп узабыз, 11 февральдә Татарстан Республикасы Яшьләр эшләре, спорт һәм туристлык министрлыгында узган Муса Җәлил исемендәге премияне бирү комитетының йомгаклау утырышында биш конкурсантка дүрт премия бирү турында карар кабул ителде. Алар түбәндәгеләр: җырчы Филүс Каһиров; Казан технология милли тикшеренү институты аспиранты Ярослав Ключников; Әлмәт татар дәүләт драма театры коллективы, шулай ук «Ялкын» журналы редакциясе һәм «Татарстан Республикасы яшьләр үзәге» дәүләт учреждениесе коллективы.

Шул рәвешле, 27 гыйнвардан 6 февральгә кадәр Төркиянең Эрзурум шәһәрендә узган кышкы Универсиадада ике алтын һәм ике көмеш медаль яулаган Татарстан чаңгычысы Алия Иксанова премиянең бишенче лауреаты булды.

Бүген, бөек татар шагыйре, Советлар Союзы Герое Муса Җәлилнең тууына 105 ел тулган көнне, премия лауреатлары һәм М.Җәлил исемендәге Республика премиясен бирү комитеты әгъзалары 1 май мәйданында шагыйрьнең һәйкәленә чәчәкләр салу тантанасында катнашачак, дип хәбәр итә ТР Яшьләр эшләре, спорт һәм туристлык министрлыгының матбугат хезмәте.