РИУ укытучылары Каһирәдән чәршәмбе көнне Казанга кайтачак

Мисырдагы чуалышлар вакытыннан алып, бүгенге көнгә кадәр алар кунакханәдә яши.

Россия Ислам университетының гыйнвар ае уртасында Каһирә шәһәренә ике атналык белем арттыру курсларына киткән укытучылары чәршәмбе көнне Казанга әйләнеп кайтачак. РИУның матбугат үзәге хәбәр иткәнчә, алар белән бергә Каһирәдә ТР Фәннәр академиясенең Г.Ибраһимов исемендәге Тел, әдәбият һәм сәнгать институты хезмәткәрләре дә булган.

Бу көннәрдә РИУ җитәкчелеге үзенең укытучыларының хәлен белешеп тора. Хәзерге вакытта РИУның уку-укыту эшләре буенча проректоры Марат Гыйльманов, теология факультеты деканы Сәет Шаһавиев һәм гарәп теле укытучылары -Мисырда. Алар иртәгә үк очкыч белән Истанбулга кайтырга тиеш.

«Без алар белән гел сөйләшеп торабыз. Чуалышлар вакытыннан алып, бүгенге көнгә кадәр алар кунакханәдә яши. Аларның ахыргы дәресләре пәнҗешәмбе көнне булган иде. Ә җомга Мисырда ял көне булып санала. Мисырда чуалышлар булса да, бернинди проблема килеп чыкмады. Безнең делегация иртәгә үк «Төркия һава юллары» белән — Истанбулга, ә үзебезгә чәршәмбе көнне «Истанбул-Казан» рейсы белән кайтачак», — дип хәбәр итә РИУ ректоры Рәфыйк Мөхәммәтшин.

Чыганак: "Татар-информ"