Бүген Казандагы “Сөләйман” мәчетендә “Домодедово” аэропортында һәлак булганнар рухына багышлап дога кылу бул

Бүген Татарстан башкаласындагы «Сөләйман» мәчетендә «Домодедово» аэропортында һәлак булган кешеләр рухына багышлап дога кылу мәрасиме үткәрелде.

Исегезгә төшерәбез: кичә «Домодедово» аэропортында коточкыч шартлау булып, анда 35 кеше үлде, 63 кеше җәрәхәтләнде.

Бу көннәрдә «Сөләйман»да күзләре күрмәүчеләрнең һәм азрак күрүчеләрнең Коръән укырга өйрәнү курслары бара. Менә шул кешеләр иман йортының фарыз залына җыелды. Башта алар арасыннан Ильяс Шәфигуллин һәм Габделәхәт абый Нигъмәтуллин бармаклары ярдәмендә изге китаптан аятьләр укыды. Аннары мәчетнең икенче имамы Раил хаҗи Әхмәтов мөселманнарга башка конфессия вәкилләре белән тату һәм түземле булырга кирәклеге турында татарча вә русча вәгазь сөйләде. Соңрак мәчетнең беренче имамы Илдар хәзрәт Баязитов сүз алып, мондый терактны хак мөселманнар кыла алмый дигән фикерен әйтте. Әмма мондый фаҗигаләр исламның дәрәҗәсенә, абруена суга.

«Теракт ясаган кешеләр, алар кем генә булуларына карамастан, Аллаһының ачуына, ләгънәтенә юлыга. Күпләп кеше үлеменә китергән вәхшилекне кылган бәндә хак мөселман була алмый. Без шартлау нәтиҗәсендә зыян күргән кешеләрнең якыннары һәм туганнарының тирән кайгысын уртаклашабыз»,- диде Илдар хәзрәт Баязитов.

Соңыннан мөселманнар вафат булган кешеләрнең рухына багышлап, бергәләп дога кылдылар. Илдар хәзрәтнең сүзләренчә, киләсе җомга намазында да бу уңайдан җәмәгать белән дога кылу булачак.