Кабарда-Балкария мөфтиен үтерделәр

Чәршәмбе көнне кич белән Нальчикта Кабарда-Балкария мөселманнары Диния нәзарәте рәисе Әнәс Пшихачев үтерелде.

«Якынча 19 сәгать 30 минутта 2 билгесез кеше МДН рәисен Есенин урамындагы 2а дагы өеннән чакырып чыгара»,-дип «Интерфакс»ка хәбәр итә Рфнең ТК тикшерү идарәсе рәисе.

Урамда алар 9 мм калибрлы пистолетлардан 4 тапкыр мөфтигә аталар. 47 яшьлек Ә. Пшихачев алган яралардан шунда ук җан бирә.

Бу факт буенча җинаять эше ачылды. Тикшерү эшләре башланды.

Алдагы көндә Ә. Пшихачев Кабарда-Балкария җәмәгатьчелеге вәкилләре белән «Түгәрәк өстәл»дә катнашты. Ул Мәскәүдә һәм төбәкләрдә милләтчелекнең баш калкытуына багышланган иде. Алар мөрәҗәгать тә кабул иттеләр.

«Россия элек тә күп милләтле һәм күп конфессияле ил иде, хәзер дә ул шулай булачак. Аның төп байлыгы да шуннан гыйбарәт» диелә бу мөрәҗәгатьтә. Аңа республикада яшәүче барлык милли-мәдәни үзәк һәм иҗтимагый оешма җитәкчеләре, дин әһелләре дә үз имзаларын куя. Мөфти Ә.Пшихачев адресына куркытып янаулар була. Мөфти экстремистларга каршы актив көрәшә. Әмма бандитлар мөфтине куркыту белән генә чикләнмиләр, чәршәмбедә аның гомерен өзәләр.