Мәчет ярты ел эчендә төзеләчәк

Греция башкаласы Афинаның Европада мәчете булмаган бердәнбер башкала икәнлеген язган идек инде. Греция җитәкчелеге бу мәсьәләне чишү өстендә җитди шөгыльләнергә кереште. Мондый карарга килү өчен әлеге төбәктә киеренкелекнең үсүе этәргеч бирде.

«Та Nea» газетасы раслаганча, хөкүмәт башкаладан ерак булмаган промзонада вакытлы мәчет бинасын төзү өчен финанслауны үз өстенә алырга ниятли. 500 кеше сыешлы зур мәчет 2012 елда шул ук районда барлыкка килер, дип көтелә.

Мәгълүм булганча, Афинада гарәп илләреннән, Африка һәм Азиянен көньяк-көнчыгышыннан килгән мәңнәрчә әһле ислам яши һәм эшли. Аларга мөселманнар зираты да кирәк булачак.

Мөселманнар хәзерге вакытта намаз укыганда һәм гаетләрдә фатирларда,склад биналарында җыелырга мәҗбүрләр,дип яза «Express Tribune».

Быел ноябрь аенда Гайдел-Әдъханы бәйрәм иткәндә җирле халык шәһәр үзәгенә җыелган мөселманнарга йомыркалар ыргытты, музыканы каты итеп куеп, вәгазьне тыңларга комачаулады. Ультра төркем ияләре ягыннан мөселманнарны көч кулланып тарату белән куркытулар яңгырады. Бәхеткә, аларга моны эшләргә Греция ОМОНы комачаулады.