Варшавада – ислам үзәге төзелер

Польшаның башкаласында ислам мәдәнияте үзәге төзелә. Башта бу проектка халык һәм иҗтимагый оешма әһелләре ризасызлык белдергәннәр иде. Хәзер исә күпләр аңа мөселманнарның бердәмлек билгесе итеп карыйлар.

Польшада, Европаның башка илләрендәге кебек, иммигрантларга җәмгыять әһеле булып китәрлек мәхәлләләрнең тату яшәвен тәэмин итәрлек ысуллар эзләргә тырышалар. Барыннан да элек, биредә Сүрия, Гыйрак һәм Ливиядән килгән мөселманнар өммәте турында сүз бара. Шуңа күрә Польша җитәкчелеге илнең төрле урыннарында мәчетләр төзелешенә рөхсәт бирә башлады.

Католик оешмаларның башта ризасызлык белдерүенә карамастан, үз динен тоту өчен мөселманнарны либераль христианнар, яһүдләр һәм дини булмаган төркемнәр яклап чыкты.

Татарлар – арадашчылар

Мәчет төзелешен оештыручылар үзләренең бу гамәленә Польшада җирле халык булып саналган татарлар булышыр, дип исәпли. Кырым татарлары Польшага моннан 600 ел элек килеп урнашканнар. Алар, гадәттә, Польша армиясен сугышчылар белән тәэмин иткәннәр. Биредәге күп кенә галимнәр һәм сәнгать әһелләре татарлар арасыннан чыкканнар.

Язучы Сәлим Хазбиевичның (Selim Chazbijewicz) фикеренчә, мондагы татарлар поляклар белән ислам мәдәнияте вәкилләре арасында арадашчы вазифасын башкара алачак. “Без, татарлар, Польша мәдәниятенең бер өлеше булып торабыз”, – диде ул Deutsche Welle хәбәрчесе белән әңгәмә вакытында.

Христианнар белән тигез хокук

Сул сәясәтче Тадеуш Ивински (Tadeusz Iwinski) мөселманнарның үсеп баручы җәмгыяте дәүләт белән мөнәсәбәтләрне рәсми дәрәҗәдә көйләргә тиеш, дип саный.

“Күп кенә чиркәү әһелләре, бигрәк тә дин өлкәсендә хакимлек итүче католиклар үзләренең мәсьәләләрен хәл кылу өчен даими рәвештә ил җитәкчелеге белән киңәшмәдә катнашалар. Мин исә Польша мөселманнары христианнарга бирелгән шул ук хокуклар белән файдаланырга тиеш, дип исәплим”, – дигән Ивински.

(“Ислам для всех” сайтыннан бераз кыскартып тәрҗемә ителде)