Беслан мөселманнары мәчет ачылышына әзерләнә

Бесланда ислам динен тотучылар мәчет ачылышына әзерләнә. Төньяк Осетия җәмәгатендә бу вакыйгага карата мөнәсәбәт гади генә түгел. Мәчетне моннан бер ай элек үк ачарга планлаштырганнар иде, әмма сентябрьдә Беслан трагедиясен искә алу ае булу сәбәпле һәм Владикавказ базарындагы теракт янә кабатлану – мәчет ачылышын ясарга ирек бирмәде.

Осетия мөселманнарына Беслан мәктәбендәге һәм Владикавказ терактларыннан соң монда яшәүчеләр тарафыннан “үзгә” караш ташлана башлау белән очраштыргалады – террористларны белер-белмәс көе ислам белән бәйләргә керештеләр. Төньяк Осетиянең мөселман руханилары исә хак динне бандитлык белән чагыштырырга ярамый икәнлекне төшендерергә тырыша килде. Беслан мәчете нәкъ менә шушы “гадәти” булмаган сораулар белән зыян күрүчеләргә ярдәм итәргә тиеш тә. “Беслан аналары” гозере буенча исә мәктәптә булып узган терактның чираттагы еллыгы уңае белән мәчет ачылышыннан да баш тартырга туры килде. Аннан соң республика мөселманнары Диния нәзарәте 9 сентябрьдә Владикавказ базарын тетрәткән шартлауда вафат булучыларга нисбәтләнгән 40 көнлек матәм көненең тәмамлануын көтәргә, дигән карар чыгарган иде, дип яза “Кавказ хәбәрләре” ("Вести Кавказа").

Моннан тыш, Төньяк Осетия мөселманнары Диния нәзарәте башлыгы Хаҗиморат-хаҗи Гацалов сөйләп узганча, “Беслан мәчетен торгызу беренче мәктәптәге теракт вакытында малае үлгән җирле эшмәкәр акчасына башкарылган”. Төньяк Осетия җәмәгать эшлеклесе Виссарион Асеев сүзләренә караганда, “киләчәктә исә Беслан мөселманнары белән теракттан зыян күрүчеләр арасындагы мөнәсәбәтләр җирле нәзарәткә бәйле булачак. Төньяк Осетия мөселманнары Диния нәзарәте хәзерге вакытта исә (элеккеге мөфти Гали-хаҗи Евтеев биргән бер интервьюсында Хаттабта укыганлыгын җиткергән иде) бүгенге мөселман лидерларының моңа карата бернинди дә катнашы юклыгын аңлатырга тиеш. Югыйсә, кешеләрне шаккатыруы җиңел, тик менә булып узган терактлардан шок алган җәмгыять белән генә тулы аңлашуга ирешүе бик тә кыен”.