Татарстан белән Мисыр ике арада хезмәттәшлекне үстерерүдә бизнес-миссияләр алмашуга зур өметләр

ТР Сәнәгать һәм сәүдә министрлыгы Мисыр Гарәп Республикасының РФ дәге илчелегенә бездәге логистика парклары, конгресс-күргәзмә чаралары хакында мәгълүмат әзерләп җибәрәчәк

Бүген ТР Сәнәгать һәм сәүдә министрлыгында министр урынбасары Булат Фәхретдиновның Мисыр Гарәп Республикасының РФ дәге илчелеге икенче секретаре Әль Камал Шәриф Мөхәммәд Абдел Латыйф белән очрашуында ике республика арасында хезмәттәшлек перспективалары барланды дип белдерә "Татар-информ".

Аерым алганда, “КАМАЗ”, “Татнефть” җәмгыятьләренең Мисыр белән хезмәттәшлегенә кагылышлы мәсьәләләр күтәрелде, дип хәбәр итә министрлыкның матбугат хезмәте. Әль Камал Шәриф Мөхәммәд Абдел Латыйф Татарстан автогиганты продукциясен Мисыр базарына чыгаруда ярдәм итәргә алынуын белдергән. Яклар шулай ук ике арада бизнес-миссияләр алмашу аша хезмәттәшлекне үстерү белән дә кызыксына.

Бүгенге очрашуда Татарстан белән Мисыр арасында хезмәттәшлекнең перспективалы юнәлешләре дип Мисырдан Татарстанның логистика парклары мөмкинлегеннән файдаланып җиләк-җимеш кайтаруны, Татарстан компанияләренең әлеге илдә тимер юлларны реконструкцияләүдә катнашуы аталган. Шуны күздә тотып, ТР Сәнәгать һәм сәүдә министрлыгы Мисыр Гарәп Республикасының РФ дәге илчелегенә Татарстандагы логистика парклары, республикада оештырылучы конгресс-күргәзмә чаралары хакында мәгълүмат әзерләп җибәрәчәк.

2009 ел йомгаклары буенча, Татарстан белән Мисыр арасында тышкы сәүдә әйләнеше күләме 86,7 млн. доллар тәшкил иткән. Шуның 99,1 проценты экспорт, 0,9 проценты импорт операцияләре өлешенә туры килә. Агымдагы елның беренче яртысында ике арадагы тышкы сәүдә әйләнеше күләме 113,7 млн. доллар булган.