Мәскәү кибетләрендә төнлә сыра сату тыела

Мәскәү кибетләрендә төнлә аракы сату тыела. Шундый ук чикләүләр Татарстанның берничә шәһәр һәм районында да кертелгән. Тик белгечләр моның белән генә халыкны айнытып буласына ышанмый. Әлеге чараларның дәвамы да булырга тиеш. Юкса монысы да бу мәсьәләдәге башка кануннар кебек кәгазьдә генә калачак.

Мәскәүдә халык көз җиткәч азрак эчә башлар дип өметләнәләр. Чөнки 1 сентябрьдән Россия башкаласындагы кибетләрдә төнге сәгать уннан иртәнге унга кадәр каты исерткечләр сату тыелачак. Әлеге исемлеккә составында этил спирты кү­ләме 15 проценттан арткан эчемлекләр эләгә. Мәскәүнең кулланучылар базары департаменты җитәкчесе Валентин Варфоломеев әйтүенчә, сыра сатуны чикләүнең дә нә­тиҗәсе булыр иде. Әмма ул алкоголь продукциясе исем­легенә кертелмәгән шул.

Алкоголь белән сәүдә итү­челәр фикеренчә, чикләүләр аракы сату күләменә әлләни зур йогынты ясамый. Тик, алар әйтүенчә, кибетләр ябык булганга халык ялган аракы һәм көмешкә эчә башларга мөмкин. Моның белән Татарстан дәүләт алкоголь инспекциясе башлыгы урынбасары Рөстәм Арсланов та килешә. “Чикләү кертелгән районнарда хәмер сату күләменең кимү-киме­мәвен раслаучы саннар юк. Әмма бу күрсәткеч артык үзгәрмәде, – ди ул. – Аның каравы, чикләү карары кабул ителгәч, башта ялган аракы күләме артты. Дөрес, аннары вәзгыять тотрыклыланды. Шуңа күрә мондый чаралар кү­релә икән, шунда ук хокук саклаучылар тарафыннан күзәтү дә артырга тиеш. Юкса бу чикләүләрнең бер файдасы да калмый”. Әйтергә кирәк, хә­мер мәсьәләсендә бүгенгә ка­дәр кабул ителгән кануннарның күбесе үтәлми. Сыраны, мәсә­лән, теләсә кайда эчәләр, ки­беттә дә аракы алу өчен паспорт күрсәтеп торасы юк.

Ә “Левада-үзәк” тарафыннан уздырылган сораштырудан күренгәнчә, халыкның кү­бесе төнлә хәмер сатуны чикләү ягында. Тамчы да капмау­чы­ларның – 84, атнага берничә тапкыр салу­чы­ларның исә 46 проценты бу фикергә теләктәшлек белдергән, дип хәбәр бирә "Ватаным Татарстан" газетасы.