Рамазан мөбарәк булсын!

Бүген кояш баегач, Рамазан ае керәчәк. Беренче тәравих намазлары да бүген укылачак. Иртәгә исә Рамазанның беренче көне – ураза башлана.

tatar-islam.ru сайт мөселман кардәшләрне Изге Рамазан ае башлану белән котлый. Бу изге айда өйләрегезгә бәрәкәт иңсен, гаиләләрегездә татулык хөкем сөрсен. Саулык-сәламәтлектә уразалар тотып, саваплы гамәлләр кылып, Рамазан аен изгелектә, иманлыкта үткәрергә язсын!

Сүз уңаеннан, Рамазан аенда Кол Шәриф мәчетендә уза торган кичке тәравих намазыннан 2 автобус йөриячәк. Казан мэриясе матбугат үзәгендә хәбәр иткәнчә, 10 августтан алып 8 сентябрьгә кадәр автобуслар намаз укучыларны төнге сәгать унбердә (23.00) Беренче май мәйданындагы Муса Җәлил һәйкәле янында көтеп торачак. Тәравихның соңгы көне 7 сентябрьгә туры килә. 
Автобусларның берсе Беренче Май мәйданы - Җиңү проспекты (Н.Ершов – П.Лумумба – Камалиев проспекты – Азино – Горки) маршруты буйлап, икенчесе Яңа Савин районы һәм Восстание урамы аша Соцгородка кадәр барачак.

 Рамазан аенда Татарстандагы барлык хәләл кафе һәм рестораннарда көне буе ураза тотканнан соң авыз ачып булачак. Кайбер кафелар ифтарларны үтемле бәяләрдән оештыра. Ә ТР мөфтияте “Азу” ресторанында студентларны һәм аз керемле кешеләрне көн саен хәйрия ашлары белән туендырачак. Моннан тыш, Казандагы “Сөембикә” кафесы тәүлек буе хезмәт күрсәтүгә күчә. 
Мәчетләр урнашкан мәхәлләләр дә хәйрия ашлары тәкъдим итә. Узган ел, мәсәлән, “Мәрҗани” мәчете янында көн саен 300 кешегә исәпләнгән “Рамазан чатыры” корылды. Шулай ук “Сөләйман”, “Мәдинә”, “Казан нуры”, “Әниләр”, “Болгар”, “Ризван” мәчетләре мөселманнар өчен ифтар мәҗлесләре оештырды.