Сочида борынгы мәчет төзекләндерелде

Сочи шәһәренең Лазаревский районы Тхагапш авылында реконструкциядән соң мәчет ачылды. РИА «Новости» хәбәр итүенчә, иман йортын яңадан торгызуга җәмәгать зур өлеш керткән.

«Бу мәчет XIX гасыр ахырында төзелгән һәм үткән гасырның 30нчы елларына кадәр эшләгән, - ди агентлык хәбәрчесенә Сочи администрациясенең хокук саклау органнары һәм җәмәгать оешмалары белән элемтә идарәсе белгече Татьяна Катаниди. – Бу мәчет Кара диңгез буенда СССРда дингә каршы актив көрәш алып барылган вакытта сакланып калган бердәнбер мәчет, аның тарихи кыйммәте зур».

1930нчы елларда агач мәчетне ябалар һәм озак вакыт склад урынына файдаланыла. 1993 елның июль аенда исә җирле дин башлыклары мәчет ишекләрен өммәт өчен ачып җибәрә, аның статусын кайтара. Әмма биредә гыйбадәт кылып булмый – мәчет бик таушалган була. Җирле халыкка сөенеч булып, иман йорты төзекләндерелә. Хәзер биредә бөтен дини йолаларны да башкарып була.

Рәсми мәгълүматлар буенча, Сочида 12 меңгә якын мөселман яши.