«Сөләйман» мәчетендәге лагерь тәмамлана: иң актив балага нетбук бүләк ителәчәк

30 июльдә Казанның «Сөләйман» мәчете карамагында эшләп килүче мөселман лагеренда ябылу тантанасы булачак. Чыгарылыш кичәсенең тантаналы өлеше 10.00 сәгатьтә башланачак. Лагерьда ял итүче балалар чыгарылыш кичәсенә ныклап әзерләнә инде. Алар иртәгә кунакларга үзләре әзерләгән программаны тәкъдим итәчәк, лагерьда алган белемнәрен күрсәтәчәк.

20 көн дәвамында 60 малай лагерьда ислем нигезләрен өйрәнде, ял итте, яңа уку елына көч туплады. Сәламәт балалар белән бергә биредә күрмәүче балалар да булды. Соңгы көнне 20 көн дәвамында үзен яхшы яктан гына күрсәткән малайларга кыйммәтле бүләкләр биреләчәк. I урынга лаек дип табылган малай - нетбук белән, II урынны алганы - кесә телефоны белән, ә III урын алганы фотоаппарат белән бүләкләнәчәк. Шулай ук  үзләрен тәртипле тотканнары өчен  тагын 10 балага мәктәп сумкасы, ә сукырларга ярдәм иткән 2 малайга кесә телефоны тапшырылачак.

Лагерьда ял иткән күрмәүче балалар да бүләксез калмаячак. Ислам динен үзләштерүдә зур тырышлык күрсәткән малайларга Коръәннең электрон версиясе бүләк ителәчәк. Күрмәүчеләр арасында иң актив бала исә фотоаппарат белән бүләкләнәчәк. Начар күрүче балаларга зур дисплейлы махсус кесә телефоннары, ә күрмәүче балаларга Брайль системасы буенча эшләүче махсус сәгатьләр бүләкләү күздә тотыла.

Моннан тыш барлык балаларга та бүләккә китаплар тапшырылачак. Бүләккә дип әзерләнгән комплектка 20 китап кертелгән. Алар арасында балалар өчен чыгарылганнарыннан алып, җитди дини басмаларга кадәр бар. Сүз уңаеннан, бүләккә бирелгән китапларны «САД» нәшрият йорты бирде. «Сөләйман» мәчете аларга зур рәхмәт белдерә.

Смена дәвамында үзләрен яхшы яктан күрсәткән балаларның әти-әниләренә «Сөләйман» мәчете рәхмәт хатлары да әзерләгән.

Әйтергә кирәк, лагерьда балалар бик яхшы ял итте. Укудан тыш малайлар өчен мәдәни-спорт программасы да төзелгән иде. Көн саен иртәнге гимнастика үткәрелде, спорт уеннары, походлар, экскурсияләр оештырылды. Малайлар «Казан Кремле» музей-тыюлыгында урнашкан «Кол Шәриф» мәчетендә, музейларда булып кайтты. Елга порты җитәкчелеге исә малайлар өчен Казансу елгасында ике сәгатьлек экскурсия оештырды. «Кырлай» паркы да балалар өчен бәйрәм үткәрде.