Малайзиядә бушлай укыйсың киләме?

Малайзиядәге Әл-Бохари Халыкара Университеты Россиядәге мөселманнар өчен бушлай белем алу мөмкинлеге тәкъдим итә. Әл-Бохари Халыкара Университеты хәйрия юнәлешендә эшләүче уку йорты булып санала. Студентларны укыту һәм яшәтү буенча бөтен чыгымнарны да үз өстенә Әл-Бохара фонды ала. Халыкара университет булганлыктан, уку йортында күбесенчә төрле мөселман илләреннән җыелган яшьләр белем ала.

Быелдан башлап, Россия яшьләренә дә Малайзиядә укып кайту мөмкинлеге тудырыла. 23 яшьтән өлкән булмаган 5 мөселман Әл-Бохара университетында белем алу өчен грант ота алачак. Моның өчен урта белем, чит илдә уку теләге, инглиз телен белү (уртача дәрәҗәдә) кирәк. Шулай ук студентлар аз керемле гаиләдән дә булырга тиеш.

Малайзиядә уку өчен грантта катнашучыларга гаризаны  http://www.aiu.edu.my:/AIU%20Student%20Application%20Form%20v2%20(Issued%2008062010).pdf сылтамасы буенча алырга мөмкин. Аны rcief@rcief.com адресына җибәрергә кирәк. Шулай ук гаризалар Россия Ислам икътисады һәм финанслары үзәгендә дә (Казан, Газовая ур., 19 йорт) кабул итәләр. Гаризалар 1 сентябрьгә кадәр кабул ителә.

Әлеге грантны откан студент университетта 1 ел дәвамында әзерлек үзәгендә белем алачак. Яхшы нәтиҗә күрсәтүчеләр алга таба аудит, бизнес-администрацияләү, информатика (инженер-программалаучы һәм челтәр технологияләре) юнәлешләре буенча укуын дәвам итә ала.

Тулырак мәгълүматны aiu.edu.my сайтында һәм (843) 277 57 55 телефоны буенча белешергә мөмкин.