Швейцарлар Татарстанда кино төшерә

Швейцария кино төшерүчеләре Татарстан турында фильм төшерергә телиләр. Аларны безнең республикада мөселманнар белән христианнарның ничек дус-тату яшәүләре кызыксындыра. Моның серен алар фильм төшерү дәвамында ачарга телиләр.

Швейцария радио-телевидение компаниясенең Мәскәүдәге вәкиле Петер Гислинг сүзләренчә, кино төшерүчеләр Татарстанда ярты сәгатьлек фильм әзерләячәкләр. Татарстан толерантлык буенча Швейцария өчен үрнәк булып тора. Чөнки бу илдә мөселманнар белән христианнар бик дус яшәми, алар арасында каршылыклар еш булып тора икән. Швейцариядә биек манаралы мәчетләр төзелү тыелганнан соң әлеге мәсьәлә тагын да актуальләшкән.

Бу уңайдан Швейцария телеканалы Татарстанның элеккеге Президенты, ТР Дәүләт киңәшчесе Миңтимер Шәймиев белән әңгәмә оештырды. 8 июльдә булган әңгәмә вакытында М.Шәймиев толерантлыкның нигезе, бу өлкәдә килеп туган авырлыклар, диннәр арасындагы дуслыкның илнең икътисадына йогынтысы турында сөйләде. «Диннәр арасындагы дуслык бер-ике елда гына барлыкка килми, бу озак еллар дәвамында алып барылган эшчәнлекнең нәтиҗәсе», - дип әйтте М.Шәймиев.

Швейцария радио-телевидение компаниясе – Россия федераль каналларына тиңдәш эре каналларның берсе. Тапшырулар 4 дәүләт телендә (алман француз, итальян, ретроман) алып барыла.

Компаниянең Мәскәүдәге корпункты «Swiss National Public Radio and TV» тапшыруларны алман телендә алып бара, шуңа күрә аларның тапшырулары ARD» һәм «ZDF» үзәк каналларында Германиядә еш кына кабатлана, дип хәбәр итә Шәймиевнең рәсми сайты.