Уфада мөслимәләр өчен такси хезмәте барлыкка килде

Уфада мөслимәләр өчен махсус такси хезмәте тәкъдим ителде. Анда клиентларга бары тик хатын-кыз йөртүчеләр генә хезмәт күрсәтә. Бу турыда башкаланың «Ләлә-Тюльпан» мәчетендә «Хәзерге җәмгыятьтә мөселман хатын-кызларының роле» фәнни-гамәли конференциясе вакытында игълан ителде. Россия Ислам университеты тарафынан оештырылган бу чара төрле милләт, төрле яшьтәге һәм төрле өлкәдә эшләүче гүзәл затларның игътибарын җәлеп итте.

Конференция эшендә Россия Ислам университеты укытыучылары һәм студенттары, Бөтендөнья башкорт корылтае Башкарма комитеты хезмәткәрләре, хәйрия һәм иҗтимагый оешма вәкилләре катнашты.

Чыгышларда гаилә мөнәсәбәтләре, балалар тәрбияләүгә һәм дингә өйрәтүдә ананың роле, мөселман хатын-кызларының әхлакый кыйммәтләре һәм хокуклары, мөселман җәмгыятендә хатын-кызның роле кебек темалар күтәрелде. Докладларның күбесендә, динебездә дә, җәмгыятьтә дә ирләр һәм хатын-кызлар тиң хокуклы, дигән фикер әйтелде. Исламда аларга тиң хокуклар бирелгән. Шуңа күрә бүген мөслимәләр гаилә учагын саклау, балалар тәрбияләү белән генә шөгыльләнеп калмый, ә сәяси, социаль, мәдәни тормышта да актив катнаша. Башкортстанда ислам динен тотучы хатын-кызлар арасында уңышлы эшкуарлар, укытучылар, сәясәтчеләр, җәмәгать эшлеклеләре бар.

Конференция вакытында шулай ук мөслимәләр өчен яңа кием модельләре дә тәкъдим ителде, дип хәбәр итә «Башинформ».