«Наджм-тур» компаниясе җитәкчелеге күрмәүчеләр өчен Тернәкләндерү үзәгенд|

«Наджм-тур» туристларның ялын оештыру компаниясенең җитәкчесе Хиҗҗави Аммар «Сөләйман» мәчетендәге күрмәүчеләр өчен Тернәкләндерү үзәгендә булып китте.

Делегация әгъзаләре Тернәкләндерү үзәге эшчәнлеге белән танышканнан соң бик гаҗәпкә калды. Чөнки биредә күрмәүчеләргә билгеләп бетергесез рухи, матди ярдәм күрсәтелә. Мәчеттә мөмкинлекләре чикләнгән кешеләр белән махсус укытучылар шөгыльләнә. Алар арасында үзләре дә шушындый ук сынауга дучар булган, әмма тормыш авырлыкларын җиңеп, алга барырга көч тапкан кешеләр дә бар. Күрмәүчеләр әлеге үзәктә бер-берсе белән аралашып кына калмый, ә ислам нигезләрен дә үзләштерә. Алар биредә Брайль системасы буенча бастырылган Коръән укырга өйрәнә, күрмәүчеләр өчен эшләнгән программа ярдәмендә компьютерда эшләү серләренә төшенә.

Очрашу вакытында компания җитәкчелеге әлеге үзәккә ярдәм итәргә вәгъдә бирде. Шулай ук оешма җитәкчелеге «Ислам-info» газетасын Мәскәү укучыларына тарату эшендә дә ярдәм тәкъдим итте. Моңа кадәр газетаны Казанның «Рубай», «Kremlin», «Дэстархан», «АЗУ» рестораннарында, «Зэм-зэм», «Милли» кафеларында, ТР Диния нәзарәтенең кабул итү бүлмәсендә алырга мөмкин иде. Шулай ук газетага язылырга да мөмкин. 2011 елда  «Ислам-info» айга ике тапкыр чыга башлаячак.

«Наджм-Тур» - Хаҗ сәфәре оештыручы Россиядәге иң эре туристик компания. Ул мөселманнар өчен берничә төрле Хаҗ программасы тәкъдим итә.