Болгарда хәзинә табылган

Болгарда барган төзекләндерү эшләре археологлар өчен зур табыш китерде. Болгар музей-тыюлыгының яңа елга вокзалы торачак урынын казыгында археологлар зур тарихи кыйммәткә ия булган табылдыкка юлыкканнар. Әлеге хәзинә XIII - XIV  гасырда яшереп куелган булган, ди тарихчылар. 6 данә алтын әйбер һәм 3 бакыр савыт 2, 5 метр тирәнлектә табылган. Ул янгын нәтиҗәсендә җимерелгән йортның подвалында яшерегән булган.

Болгар музей-тыюлыгы директоры Рафаил Мәхмүтов сүзләренчә, алтын бизәнү әйберләре подвалның идәнендә үк чәчелеп яткан. Бизәнү әйберләре арасында кыйммәтле таш белән бизәлгән 3 алтын алка, фирүзә белән бизәлгән 2 асма беләзек, 1 йөзек бар. Беләзекнең берсе кош формасында эшләнгән, икенчесе имән чикләвеген хәтерләтә. Алар икесе дә бизәкле үрү техникасы ярдәмендә эшләнгән. Табылган савыт-саба исә ике казаннан һәм зур чүмечтән гыйбарәт.

Мәхмүтов әфәнде сүзләренчә, мондый зур табылдыклар соңгы 10 ел дәвамында бөтенләй булмаган. Табылган әйберләр барысы да Болгар музеена тапшырылган, дип хәбәр итә «Бизнес-онлайн» электрон газетасы.

Әйтергә кирәк, елга вокзалы төзелергә тиешле урында элек һөнәрчеләр кварталы булган. Мондагы казу эшләре вакытында элегрәк тә археологлар ике зәркан эшләнмә һәм бер йөзек тапкан булганнар. Хәзер исә Алтын Урда чорына караган 6 торак йорт урыны казыла. Ә казу эшләре алып барыла торган гомуми мәйдан 4 мең квадрат метр тәшкил итә. Археологлар табышлар алга таба да булыр, дип өметләнә.