Татарстанда ачлык булмаячак!

Республикада азык-төлеккә бәяләр күтәрелмәячәк, дип хәбәр итә «Комсомольская правда». Республика инде икенче ел рәттән корылыктан зыян күрә. ТР авыл хуҗалыгы министры Марат Әхмәтов әйтүенчә, быелгы хәлләр үткән елдагыга караганда мөшкелрәк. Кыш салкын булу сәбәпле 460 мең гектар мәйданда уҗым өшегән иде. Инде менә хәзер корылыктан иген басулары интегеп утыра.

Ләкин җитәкчеләр Татарстанда ачлык була, бәяләр артачак икән дигән имеш-мимешләрне кире кага. «Ипи бәясе элеккеге кебек калачак. Бәяләр арту көтелми. Үткән елдан калган уңыш быелга җитәргә тиеш», - дип белдерде бу уңайдан Марат Әхмәтов. Татарстан фермерлары һәм крестьян хуҗалыклары ассоциациясе рәисе Камияр Байтимеров та: «Ачлык турында сүз дә булырга мөмкин түгел. Үткән елгы запаслар шактый әле. Ә менә бәяләр артырга бик мөмкин. Арадашчы алып сатарлар корылык дигән булып, акча эшләп калырга омтылачак», - диде.

Авыл хуҗалыгы министры сүзләренчә, хәзергә төп бурыч - мал-туарны саклап калу. Моның өчен өстәмә рәвештә кукуруз, рапс, суданка чәчкәннәр. ТР Хөкүмәте хәзер авыл хуҗалыгы оешмаларына ашлама сатып алу өчен акча бүлеп бирергә җыена. Шулай ук Авыл хуҗалыгы министрлыгы корылыктан килгән зыянны киметү өчен федераль үзәктән дә ярдәм сорарга ниятли.