Мәскәү җитәкчелеге милләтара мөнәсәбәтләрне көйләргә алынды

Мәскәү мэры Юрий Лужков Россия башкаласында милләтара мөнәсәбәтләр өлкәсендә дәүләт сәясәтен тормышка ашыру концепциясен хуплап чыкты. «Концепция Мәскәү шәһәренең төбәкара элемтәләр һәм милли сәясәт комитеты тарафыннан милләтара мөнәсәбәтләр мәсьәләсен тәртипкә салу эшен комплекслы һәм системалы рәвештә камилләштерү максатыннан төзелде», - дип җиткерде мэрия вәкиле РИА «Новости» хәбәрчесенә. Аның әйтүенчә, әлеге документ Мәскәү һәм җирле үзидарәләргә, хезмәт коллективларына, уку йортларына, җәмәгать оешмаларына милләтара мәсьәләләләрне хәл иткәндә өлге булып торачак. Мәскәү җитәкчелеге шулай ук милләтара мөнәсәбәтләр өлкәсенә бәйле юридик терминнарның төгәл билгеләмәләрен булдырырга планлаштыра. Бу экстремистлык кебек тискәре күренешләрне башында ук юк итәргә булышачак.

Моннан тыш, Ю.Лужков җирле хакимият вәкилләренә рус телен начар белә яисә бөтенләй белми торган чит милләт кешеләрен дә Мәскәү белем бирем системасы һәм җирле социумга кертү чараларын күрү максатын куйган. Бу максатны тормышка ашыру өчен башкалада рус телен укыту системасы камилләштереләчәк, мигрантлар балалары өчен социаль адаптация ресурс үзәкләре һәм этно-мәдәни компонентлы мәгариф учреждениеләре ачылачак.

Концепциядә шулай ук XX гасыр дәвамында Мәскәү халкы 10 тапкырга арткан, ә шәһәр территориясе 1960нчы еллар белән чагыштырганда нибары 10 процентка гына зурайган. Мэрия мәгълүматлары буенча, бүген Мәскәүдә үзен рус милләтеннән дип санаучылар башкала халкының 84,7 процентын тәшкил итә. Әмма Мәскәү хакимияте башкалада яшәүчеләрнең өчтән бер өлеше катнаш никахлардан тууын әйтә.