«Дин нигезләре» фәне: беренче нәтиҗәләр

Свердловск өлкәсенең Мәгариф министрлыгы «Дин нигезләре һәм дөньяви этика» фәнен укыту буенча беренче нәтиҗәләр һәм перспективалар турында семинар-киңәшмә үткәрде. Киңәшмәдә рәсми орган вәкилләре, Свердловск өлкәсенең Мәгарифне үстерү институты һәм Курган өлкәсенең Мәгариф хезмәткәрләренең белемен күтәрү институты галимнәре, укытучылар, педагоглар, дин эшлеклеләре, иҗтимагый оешма вәкилләре катнашты, дип хәбәр итә IslamRF.Ru сайты.

Свердловск өлкәсендә хәзерге вакытта әлеге курсны укыту буенча эксперимент үткәрелә. Экспериментта 35 мең укучы һәм 2 мең укытучы катнаша. Әлегә факультатив буларак «Дин нигезләре һәм дөньяви этика» фәнен 4 сыйныф укучылары үзләштерә. Аларның әти-әниләрен җыеп, курсны сайлау үзенчәлекләре аңлатылган. Уку барышында укыту планына, программага кайбер үзгәрешләр кертелгән.

Мәгарифне үстерү институты ректоры О.Гайнанов сүзләренчә, институт укытучыларын махсус рәвештә Мәскәүдә укытып кайтарганнар. Өлкәдән 132 укытучы Мәскәүдә Мәгариф хезмәткәрләренең белемен күтәрү академиясендә белем күтәреп кайткан. Яңа фәнне укытырга тиешле калган педагогларга нәкъ менә алар белем биргән.

«Дин нигезләре һәм дөньяви этика» фәнен укыту буенча килеп туган проблемалар турында да сөйләшү булды. Иң зур проблема: дәреслекләр һәм методик әсбаплар булмау. Шулай ук укытучыларга хезмәт хакы түләү системасы да әлегә җайга салынмаган. Нәтиҗәдә, яңа фәнне төп расписаниегә кертеп булмый, ә аны дәресләрдән соң яки сыйныф сәгате урынына укыту педагогларны да укучыларны да канәгатьләндерми.

Әлеге мәсьәлә турында сөйләшү төгәлләнмәде әле. Ул Мәскәүдә дәвам итәчәк. 16 сентябрьдә башкалада «Дин нигезләре һәм дөньяви этика» фәнен укыту буенча зур җыелыш-киңәшмә үтәчәк.