![](/_pu/65/img_v_tatarstane_6548.jpg)
«Азатлык» радиосы хәбәр итүенчә, быел Омскида Сабантуй бәйрәме хәмерсез үткәрелгән. Шәһәр күләмендә Сабан туе узган ял көнне, һәр елдагыча, авыл хуҗалыгы күргәзмәләре үткәрелә торган «Агро-Омск» паркында булып узган. Бәйрәмне Омски шәһәре хакимияте ярдәме белән өлкә Татар милли-мәдәни мохтарияте оештырган. Бәйрәмдә Татарстан кунаклары буларак Мөслим районы вәкилләре килгән. Милләттәшләребезгә Татарстан Президенты Рөстәм Миңнеханов сәламен Мөслим муниципаль районы башлыгы Ришат Хәбипов тапшырган.
Сабантуй Себер ягы мөселманнары Диния нәзарәте рәисе, мөфти Зөлкарнәй хәзрәт Шакирҗановның хәер-догасы белән башланган.
Рәсми даирәләрдән Өлкә кануннар чыгару җыелышы депутаты Равил Бикбавов һәм «Бердәм Русия» партиясенең Омски бүлеге рәисе урынбасары, «Дуслык йорты» директоры Наталья Степанова халыкка котлау сүзе җиткергән.
Милли бәйрәмебез Сабан туе Омски өлкәсенең авыл-районнарда да үткәреләчәк. Быел да Сабан туе Усть-Ишем, Тевриз, Муромцево, Тара районнарында булачак.