Татарстан Югары суды Александр Тимофеевны 300 миллион сум күләмендә штрафка тарту турында карар чыгарды

Татарстан Югары суды Югары Ослан районының элеккеге башлыгы Александр Тимофеевны 300 миллион сум күләмендә штрафка тарту турында карар чыгарды.

Суд шулай ук Тимофеевны 3 елга дәүләт һәм муниципаль органнарда вазифа биләү хокукыннан мәхрүм итте. Элеккеге түрәгә суд карары бүген чыгарылды. Суд Тимофеевның моңарчы хөкем ителмәве, яшь балалары, өлкән яшьтәге ата-аналары, төрле бүләкләре булуы, тәүбә итүе һәм тикшерүчеләргә актив ярдәм күрсәтүенә бәйле рәвештә, иң түбән җәза бирү турында карар чыгарды. Суд Тимофеевның милкенә (машина, автомобиль кую урыны, бүлмә) алдарак салынган арестны үзгәрешсез калдырды.

Адвокат Аскар Пономарев журналистларга суд карарыннан канәгать булуы, А.Тимофеевның иректә калуы хакында хәбәр итте. Суд карары әлегә законлы көченә кермәгән, якларның аның белән риза булмыйча шикаять бирү өчен вакыты бар.

Искәртеп узабыз, Тимофеев РФ Җинаять кодексының 290 нчы маддәсе 6 нчы өлешендә («Җирле үзидарә органы башлыгының аеруча зур күләмдә ришвәт алуы») каралган җинаятьтә гаепләнә.

2011 елның октябрендә Тимофеев үзе таләп иткән сумманың бер өлешен — 3 миллион сум акча ала, 21 октябрьдә тагын 2 миллион сумны кесәсенә сала, шуннан соң полиция хезмәткәрләре тарафыннан тоткарлана.

Дәүләт гаепләүчесе судтан А.Тимофеевны катгый режимлы төзәтү колониясендә җәза үтәү шарты белән 9 елга ирегеннән мәхрүм итүне һәм 500 миллион сум күләмендә штрафка тартуны сорады дип хәбәр итте «Татар-информ».