РИУда «Сөләйман» мәчете имамы Илдар хәзрәт Баязитов лекция сөйләде

Кичә Казандагы Россия Ислам университетында «Сөләйман» мәчете имамы, Күзләре күрмәүчеләрне тернәкләндерү үзәге җитәкчесе Илдар хәзрәт Баязитов һәм «Ярдәм» Ислам милли хәйрия фонды президенты Илһам Исмәгыйлев студентларга лекция сөйләделәр.

Танылган Казан имамы мәхәллә эшләрен оештыру тәҗрибәсе белән уртаклашты һәм «Сөләйман» мәчетендә хәйрия эшчәнлеген алып бару хакында сөйләде. Аерым алганда, биредә Күзләре күрмәүчеләр өчен төзелгән «Ярдәм» Ислам милли хәйрия фондының эше, сукырлар өчен Луи Брайль системасы буенча мөселман әдәбиятын бастыручы нәшрият үзәге, социаль яктан уңышсыз килеп чыккан гаиләләргә хәйрия ярдәме һәм мәчет каршындагы балалар лагере турында сүз барды. Илдар хәзрәт Баязитов «Сөләйман» мәчете эшчәнлеге үсешендә иганәчеләрнең мөһим роль тотканлыгын сөйләде, алар белән эшләүнең нечкәлекләре һәм авырлыклары хакында бәян кылды.

Илдар хәзрәт үзенең чыгышында мәхәлләнең әгъзалары хәйрия чараларын тәэмин итәрлек коммерция проектларын үстерүнең әһәмияте зур икәнлеген яхшы аңлыйлар дип белдерде. «Хәзер без өстәмә проектлардан кергән керемне Күзләре күрмәүчеләрне тернәкләндерү үзәген тәэмин итүгә юллыйбыз. Тик бу проектлар әле бик яшь, шуңа күрә аларның кереме зур түгел»,-дип сөйләде Илдар хәзрәт.

И. Баязитов форсаттан файдаланып, мәчетнең күп кенә массакүләм мәгълүмат чаралары (шул исәптән реклама газетасы) булуы, яңа төзелеп килүче Тернәкләндерү үзәгенең мәчете һәм башка проектлар турында хәбәрләр ирештерде.

РИУга кунакка килгән хәзрәтләр студентларга «Сөләйман» мәчете әһелләренең эшчәнлеге турында төшерелгән документаль фильм күрсәттеләр. Аннары Илдар хәзрәт Баязитов белән Илһам Исмәгыйлев студентларның күпсанлы сорауларына җаваплар бирделәр, дип хәбәр итте «Исламский портал».