77 кешене үтергән норвегияле террорчы журналистларның игътибар үзәгендә

77 кешене үтерүдә гаепләнгән норвегияле Андерс Брейвикка журналистлар белән әңгәмә кору рөхсәт ителгән.

Төрмәдә утыручы Брейвик янына бүгенге көннән кешеләр, шул исәптән журналистлар да килә ала, чөнки аннан мәхкәмә тыюы алынган. Инде йөзәрләгән репортёрлар бу бәндә белән очрашырга теләк белдергән. Экспертлар бу хәлне Норвегия җәмгыятенең артык түземле булганлыгы өчен килеп чыга һәм Брейвик идеяләрен пропагандалауга юл ачылырга мөмкин дип кисәтә. Ник дигәндә, җинаятьче үзе кылган терактларны Европаның исламлашуына каршы көрәшүе белән бәйләп аңлаткан.

Норвегиянең матбугат берлеге җитәкчесе журналистларны судка кадәр Брейвик белән әңгәмә кормаска чакырып чыгыш ясаган. Аның сүзләренчә, бу әңгәмәләрнең теракт корбаннары туганнарына ничек итеп яңа йөрәк яраларын кузгалтуын күрмәс өчен сукыр һәм тинтәк булырга кирәк.

Беренче сорау алулар вакытында 32 яшьлек Андерс Брейвик узган елның 22 июлендә ике төрле теракт ясаганлыгын таныган. Ул Ослоның эшмәкәрләр кварталында автомобиль шартлаткан һәм Утёйа утравында ял итүчеләргә ут ачкан. Нәтиҗәдә, 77 кеше һәлак булган, 100гә якыны яраланган. Брейвик үзенең бу кыңгыр эшен Европаны исламнан коткару өчен башкаруы турында әйткән. Норвегия психиатрлары Брейвик шизофрения белән авырый дигән нәтиҗәгә килгәннәр һәм аны көчләп дәвалануга җибәрергә кирәклеге турында белдергәннәр.

Брейвикның эше судта апрель урталарында каралыр дип көтелә.