Татарстанда 26 торак пункт утсыз калды

Авария нәтиҗәләрен 14.00 сәгатькә бетерү күздә тотыла

«Татар-информ" нан алынган мәгълүматларга караганда, бүген 08.55 сәгатьтә Россия Гражданнар оборонасы эшләре, гадәттән тыш хәлләр һәм бәла-каза нәтиҗәләрен бетерү министрлыгының Татарстан Республикасы буенча Баш идарәсенең Кризислы хәлләрдә идарә итү үзәгенә начар һава шартлары нәтиҗәсендә Татарстан Республикасы территориясендә 26 торак пунктта ут бетүе хакында хәбәр килде.

Нәтиҗәдә, 1720 йортта яшәүчеләр (Лаеш, Нурлат, Мамадыш, Кайбыч, Яңа Чишмә һәм Алабуга районнарында гомер кичерүче 6881 кеше) утсыз калды. Социаль әһәмияткә ия объектларда ут бетүе турындагы мәгълүматка төгәллек кертелә.

Россия Гражданнар оборонасы эшләре, гадәттән тыш хәлләр һәм бәла-каза нәтиҗәләрен бетерү министрлыгының Татарстан Республикасы буенча Баш идарәсендә оператив штаб төзелде, тиешле хезмәтләргә хәбәр җибәрелде.

Һәлакәт нәтиҗәсендә үлүчеләр һәм зыян күрүчеләр юк.

Авария нәтиҗәләрен бетерү өчен 6 муниципаль районнан оператив төркемнәр (12 кеше, 6 берәмлек техника) һәм район электр челтәрләренең авария бригадалары (18 кеше, 6 берәмлек техника) җәлеп ителде.

Авария нәтиҗәләрен 14.00 сәгатькә бетерү күздә тотыла, дип хәбәр итә ТР Гражданнар оборонасы эшләре һәм гадәттән тыш хәлләр министрлыгының матбугат хезмәте.