"Мода белән тегелгән хиҗәп: яклыйсызмы әллә каршымы?"

14 декабрь РИУда студентлар фикер алышуы Хатын-кызлар лигасы турнирының өченче этабы үтте.

Биредә «Мода белән тегелгән хиҗәп: яклымы әллә каршымы?» дигән сорау куелган иде.

Мода белән тегелгән хиҗәп яклы төркемнең исеме «Фисәбилилләһ» (ягъни "Аллаһ юлында"), каршы якның исеме «Взгляд» («Караш») иде.

Фикер алышу өч раундтан торды. Аның үз кагыйдәләре дә бар иде.

1. Кызлар чыгыш ясаганда бер-берләрен бүләргә тиеш түгел;

2. Шәхси характердагы сораулар бирү тыела;

3. Үз фикерен белдерүче куелган регламентны узмаска тиеш.

Беренче раундта кызлар үз фикерләрен яклады, дәлилләр китерде. Мәсәлән мода белән тегелгән хиҗәп яклы төркем: «Якты, ачык киемнәрдән йөрергә кирәк. Аллаһ матур һәм матурлыкны ярата», — ди. «Караш» кызлары булдыра алганча гади һәм тыйнак киенү яклы. Пәйгамбәребезнең киемгә кагылышлы сөннәте барлык чорга да бер, дип саный.

Икенче раундта командалар бер-берләренә сораулар яудырды. Шул рәвешле күзәтүчеләрне кызыксындырган мәсьәләләргә дә ачыклык кертте.

Өченче раундта студент кызларның фикер алышу кичәсенә килгән мөслимәләрдән сораулар яңгырады.

Ниһаять күп әйтелгән фикерләрдән соң, йомгаклау өлешенә дә килеп җиттек.

Жюри вәкилләре: Марат Гыйльманов, Антонова Айгөл, Зиннәтова Ләйлә бертавыштан «Фисәбилилләһ» төркеменә тавыш бирде. Тамашачылар ике төркемгә бүленеп, берсе «Караш» командасын, икенче «Фисәбилилләһ» командасын яклады.

Шулай итеп, әлеге чарада «Фисәбилиләһ» командасы җиңү яулады.

Искәртеп узабыз: мондый фикер алышулар хакыйкатьне эзләүдән түгел. Чөнки моңа дин галимнәре күптән үз фикерләрен әйткән инде. Биредә максат: студент кызларның үз сүзләрен төгәл, аңлаешлы итеп тамашачыларга әйтеп бирә белүе, сөйләм сәләтләрен күрсәтә алуы. Шуңа да бәя биргәндә кызларның ни рәвешле дәлилле, анык итеп чыгыш ясауларына игътибар ителде.

Инде киләсе атнага булачак тема: «Баланы кая укырга бирергә: дөньяви мәктәпкәме, әллә дини мәктәпкәме?»