Татарстан гимны текстын татар һәм рус телләрендә эшләргә тәкъдим ителә

Бүген ТР Дәүләт Советының Мәдәният, фән, мәгариф һәм милли мәсьәләләр комитеты утырышында иң яхшы ТР Дәүләт гимны тексты проектына иҗат конкурсы игълан итү турында фикер алыштылар

«Татар-информ»нан алынган мәгълүматларга караганда, бүген ТР Дәүләт Советының Мәдәният, фән, мәгариф һәм милли мәсьәләләр комитеты утырышында иң яхшы ТР Дәүләт гимны тексты проектына иҗат конкурсы игълан итү турында фикер алыштылар. Фикер алышуда шулай ук ТР Дәүләт Советы Рәисе урынбасары Римма Ратникова да катнашты.

Комитет рәисе Разил Вәлиев билгеләп үткәнчә, Татарстан гимны ТР Югары Совет карары белән, 1993 елның 14 июлендә расланган. «Республикабыз җәмәгатьчелеге инде күптәннән республика гимны текстын язу кирәклеге һәм мөһимлеге турындагы мәсьәләне күтәреп килә. Сүзләрдән башка гимн ничектер тәмамланмаган сыман, сүзләрсез җыр кебек», — дип белдерде рәис.

Россия гимнының да, РФ төбәкләренең күпчелек гимннарының да (алар, Татарстанныкы кебек, төбәк гимннары дип атала) сүзләре бар һәм алар бу субъектларда яшәүче халыклар телләрендә яңгырый. Мәсәлән, Мордовия Республикасы гимны бер текстта 3 телдә — мукшы, эрзя һәм рус телләрендә, Саха-Якутия Республикасыныкы — ике текстта якут һәм рус телләрендә, Башкортостан Республикасыныкы — ике текстта башкорт һәм рус телләрендә яңгырый. «Гимн музыка һәм сүзләр белән үрелеп бирелгәндә ватанпәрвәрлек һәм горурлык хисләрен формалаштыруга, үзаңны үстерүгә, югары хисләр уятуга, тарихны, традицияләрне һәм кешеләрнең героик көрәшен югары күтәрүгә нигез була. Гимнны теге яки бу территориядә яшәүче халыклар телләрендә башкару аларны якынайта», — диде Р.Вәлиев.

Комитет рәисе хәбәр иткәнчә, ТР Дәүләт Советы Рәисе Фәрит Мөхәммәтшин йөкләмәсе белән, ноябрь аенда эшче төркеме төзелеп, иң яхшы ТР Дәүләт гимны тексты проектына иҗат конкурсы игълан итү турында нигезнамә проекты эшләнгән. Әлеге документ нигезендә бәйге 2012 елның 1 гыйнваренда башланып, 31 декабрьдә тәмамланырга тиеш. Конкурсантлар бәйгедә шәхси кодлар алып, аноним рәвештә катнаша ала. Бәйге комиссиясе әгъзалары конкурста катнаша алмый. Гимн текстын татар һәм рус телләрендә эшләргә тәкъдим ителә.

Бәйге ике өлештән тора: беренче этапта комиссия иң яхшы дип табылган 3 текстны сайлап алачак. Икенчесендә исә иң яхшы бер текст аерып чыгарыла. Аннан соң махсус комиссия текстны гимн музыкасына туры китереп эшләп бетерәчәк. Әмма гимнның ике телдәге ахыргы варианты һәм аны башкару тәртибе ТР Дәүләт Советы утырышында расланачак.

«ТР Дәүләт Советы Дәүләт гимны тексты ватанпәрвәрлек хисен, тарихны хөрмәт итүне, бердәмлек һәм Татарстан халыклары дуслыгын, аларның мәдәни традицияләрен чагылдырырга тиеш. Гимн тексты гимн музыкасына, аның темпына һәм күләменә туры килергә тиеш», — диелә нигезнамәдә. Гимн текстлары комиссиягә бер яки ике дәүләт телендә тапшырыла ала.

Депутат Туфан Миңнуллин сүзләренчә, гимнның тексты татар телендә булырга һәм рус теленә тәрҗемә ителергә тиеш. Аның коллегасы Азат Зыятдинов та төп текстның татар телендә булырга тиешлеген әйтте.

Римма Ратникова билгеләп үткәнчә, республикада ике дәүләт теле һәм бәйге нигезнамәсендә гимн текстын татар телендә язабыз һәм рус теленә тәрҗемә итәбез дип бирүнең четереклерәк икәнлеген белдерде.

ТР Дәүләт Советы Рәисе урынбасары фикер алышу барышында гимнның сүзләрен булдыру мәсьәләсенең өлгереп җиткәнлеген, шул ук вакытта катлаулы эш булуын билгеләп үтте. Ул Татарстанда гимн текстын язарлык иҗади көчләр барлыгына ышаныч белдерде. Фикер алышулардан шул аңлашылды: әгәр рус телендә яхшы текст килсә, аны татар теленә тәрҗемә итү, әгәр татарчасы килсә — русчага тәрҗемә кылу юллары да карала.