Соңгы бер атнада Казанда регуляр маркалы бензин бераз арзанайды

Аның литры уртача 26 сум 82 тиен тора

Соңгы бер атнада Казанда АИ-93,92 маркалы бензин 3 тиенгә арзаная төште һәм литры уртача 26 сум 82 тиеннән тәкъдим ителде. Калган төр мотор ягулыгы бәяләре үзгәреш кичермәде. А-76 лы бензинның литры уртача 24 сум 99 тиен, АИ-95 лесе -28 сум 62 тиен, дизель ягулыгы хакы уртача 25 сум 19 тиен дәрәҗәсендә калды. Бу хакта Дәүләт статистикасы федераль хезмәтенең ТР идарәсе хәбәр итә.

Идел буе федераль округына кергән төбәкләр башкалалары арасында иң кыйммәтле автомобиль ягулыгы узган атна йомгаклар буенча да Йошкар-Ола, Самара, Пермь һәм Түбән Новгородта. Литры уртача 25 сум 63 тиен торган А-76 лы бензин — Йошкар-Олада, литры 27 сум торган АИ-93,92 ле ягулык — Самарада, уртача 28 сум 88 тиен торган кыйммәтле премиум маркалы бензин — Пермьдә. Түбән Новгородта дизель ягулыгы тагын 22 тиенгә кыйммәтләнеп, литры уртача 27 сум 23 тиенгә җиткән.

Иң арзанлы бензин сатылучы шәһәрләр исемлеге бераз үзгәргән. Саратовта А-76 лы бензинның литры өчен уртача 23 сум 40 тиен түләргә кирәк. АИ-93,92 ле ягулык Пензада уртача 25 сум 57 тиен тора. Иң арзанлы, АИ-95 ле бензин — Кировта (27 сум 35 тиен), дизель ягулыгының арзанлысы бу юлы — Самарада (24 сум 71 тиен), дип хәбәр итә "Татар-информ".