«Яңа гасыр» радиосы Диния нәзарәте белән берлектә «Сабыйга» дип исемләнгән чара үткәрә

Диния нәзарәтенең матбугат хезмәтеннән алынган чыганакларга караганда, 2011 елның 18 октябреннән 18 ноябренә хәтле «Яңа гасыр» радиосы Татарстан мөселманнары Диния нәзарәте белән берлектә «Сабыйга» дип исемләнгән чара үткәрә.

Әлеге чара кысаларында Казанның Киров районы Балалар йогышлы авырулары хастаханәсенә ярдәм күрсәтеләчәк. Биредә ата-аналары тарафыннан ташланган авырулар, күкрәк балалары ята. Сабыйларга кендекләрен чистартыр өчен мамыклы таякчыклар, 1,2,3 чамасындагы памперслар, кечкенә балалар киеме кирәк.

Ярдәм итәргә теләүчеләр Диния нәзарәте адресы буенча мөрәҗәгать итә ала. ТР. Казан шәһәре, Лобачевский ур., 6/27; 7 кабинет — ярдәм күрсәтү һәм хәйрия бүлеге.

Белешмәләр өчен телефон (843)236-52-12, 8-987-263-98-89 (Гөлнара)

Пәйгамбәребез Мөхәммәд (с.г.в.) ятимнәргә карата мөнәсәбәт хакында әйткән: «Арагыздан кем үзенә асрамага ятимне ала, аның хокукларын үти һәм назлап башыннан сыйпый, шуны Аллах ятимнең башында булган чәч бөртекләре санында бүләкли, шул чәч бөртекләре санындагы гөнаһларын кичерә,» (Мэҗэл бәян).