Төмән мәчетләре турында китап бастырылып чыгарылды

Күптән түгел Төмән өлкәсе (өлкәнең көньягы, Югра һәм Ямал) мәчетләре турында 120 битле, 1000 тираж белән «Мечети и мусульманские организации Тюменской области» дип аталган китап бастырылып чыгарылды.

Аны казак милләтеннән булган журналист Калил Кабдулвахитов төзегән, рецензентлары — тарих фәннәре кандидаты В.П.Клюева һәм Урал төбәге мөселманнары җитәкчесе вазифаларын үтәүче А.Мостафин.

Бу китапны дөньяга чыгару Россиянең Азия өлеше мөселманнары Диния нәзарәтенең Фатыйх хәзрәт Гарифуллин җитәкчелегендәге Төмәндәге вәкиллеге башлангычы белән Ислам мәдәниятенә, фән һәм мәгарифкә ярдәм итүче вакыф һәм Нурулла Саттаров җитәкчелегендәге Төмән өлкәсе татарлары Конгрессының финанс ярдәме белән гамәлгә ашты, дип яза "Татар-Информ"

4-5 ел элек «Сто мечетей Тюменской области» исемле китап дөнья күргән иде инде, шуннан соң тагын яңа мәчетләр төзелде һәм соңгы китапта Төмән өлкәсенең 150 мәчете телгә алына.

Китапта кыскача гына һәр мәчетнең төзелеш тарихы, имамнары, дини оешмаларның җитәкчеләре турында белешмә бирелә, мәчетләрнең кайсы Диния нәзарәте каршында (Төмән өлкәсе мөселманнары Диния нәзарәте, Росиянең Азия өлеше мөселманнары, Россия мөселманнарының Үзәк Диния нәзарәтләренең Төмәндәге вәкиллекләре) теркәлгәнлеге я булмаса рәсми теркәлмәгән булуы турында әйтелә, ул фоторәсемнәр белән бик бай бизәлгән.

Әлеге китап 2010 нчы елның башында билгеле булган мәгълүматлар белән чикләнгән. Мәчетләр төзелеше дәвам итә, узган һәм агымдагы елда төзелешләре тәмамланып, берничә мәчетнең ишекләре ачылды инде, мәчет төзелеше башланган гына төбәкләр дә бар.