Йошкар-Ола шәһәренең 14 нче гимназиясендә беренче татар сыйныфы ачылачак

Марий Эл республикасы Йошкар-Ола шәһәренең 14 нче гимназиясендә беренче татар сыйныфы ачылачак. Мәктәп директоры Татьяна Глушкова сүзләренә караганда, милли сыйныф төзү идеясе күптәннән булган. Ник дигәндә, татар телен өйрәнергә теләүчеләр саны бик күп икән. Ниһаять, республиканың Мәгариф һәм фән министрлыгы татар мәдәнияте үзәге ярдәме белән татар классы булдырган.

Мәктәп программасына килгәндә исә ул башка программалардан берни белән дә аерылмый. Балаларга атнага өч тапкыр татар теле һәм мәдәнияте нигезләрен өйрәтәчәкләр. Татар мәдәнияте үзәге белгечләре сүзләренә караганда, уку китаплары инде кайтарылган. Укудан тыш балалар төрле түгәрәкләрдә дә шөгыльләнә алачак.

Бу эштә иң авыры — татар телендә яхшы итеп укыта алырлык, югары квалификацияле башлангыч сыйныфлар укытучысы табу булган. Ниһаять, узган атнада Мәгариф һәм фән министрлыгы шатлыклы хәбәр җиткергән: балаларны Казан университетын тәмамлаган белгеч укытачак.

Әйтергә кирәк, бүген Марий Эл мәктәпләрендә 35 мең укучы мари телен өйрәнә, шуларның 9 912се өчен ул — туган тел. Татар теле 1 023 укучы өчен укытыла. 93 бала удмурт телен өйрәнә, дип хәбәр итә «Марийская Правда» газетасы.