«Булгария» дә һәлак булганнарның туганнарына компенсация түләүләр бүген башланачак

«Булгария» теплоходы фажигасендә һәлак булганнарның гаиләләренә һәм каза күрүчеләргә бер тапкыр матди ярдәм күрсәтү турында кичә Татарстан Хөкүмәте 398 нче номерлы карар чыгарды.

Татарстанда яшәп, «Булгария» теплоходы һәлакәте нәтиҗәсендә быел 10 июльдә һәлак булган һәрбер кеше өчен гаилә әгъзаларына (хатынына (иренә), балаларына һәм иждивениядәге затларга) 300 мең сум, сәламәтлегенә зыян килүчеләргә, зыянның дәрәҗәсен исәпкә алып, 100 мең сумга кадәр, һәлакәт вакытында милкен югалтучыларга 10ар мең сум күләмендә акча түләнеләчәк. Моның өчен гражданнарга ТР Хезмәт, мәшгульлек һәм социаль яклау министрлыгының территориаль органына мөрәҗәгать итәргә кирәк була, ягъни мөрәҗәгать иткәннән соң гына башкарыла. Бер тапкыр түләнелә торган шушы матди ярдәмне алыр өчен таләп ителә торган документлар исемлеге якын арада ТР Хезмәт, мәшгульлек һәм социаль яклау министрлыгы белән ТР Гражданнар оборонасы һәм гадәттән тыш хәлләр министрлыгы сайтларында урнаштырылачак.

Бүген, шушы һәлакәт сәбәпләрен тикшерү буенча хөкүмәт комиссиясенең РФ транспорт министры Игорь Левитин рәислегендә уздырылган утырышыннан соң, ТР Президенты Рөстәм Миңнеханов белдергәнчә, әлеге акчалата компенсацияләр иртәгәдән түләнелә башлаячак һәм моның өчен үлү турындагы таныклык (алар хәзер 58 кешегә карата тапшырылган) нигез булачак. И.Ливитин искәрткәнчә, РФ Премьер-министры Владимир Путин шушы фаҗигадә һәлак булганнарның туганнарына федераль бюджеттан 1әр млн. сум акча бүлеп бирү турындагы күрсәтмәгә кул куйган. Ул акча Татарстан Хөкүмәтенә тапшырылачак, ул, үз чиратында, — һәлак булган һәр кешенең, шул исәптән Россиянең башка төбәкләрендә яшәгәннәрнең туганнарына. Татарстан Президенты, бу эш оператив башкарылачак, дип вәгъдәләде.