Әлегә Казанның 6 нчы хастаханәсе белән 1 нче Ашыгыч медицина ярдәме хастаханәсендә 1әр хатын-кыз

«Булгария» теплоходы һәлакәтендә исән калып, хастаханәләргә эләгүчеләрдән Республика клиник хастаханәсенең Имгәнүләр үзәгеннән барысы да хәзерге вакытта чыгарылган, әлегә Казанның 6 нчы хастаханәсе белән 1 нче Ашыгыч медицина ярдәме хастаханәсендә 1әр хатын-кыз — А.Г.Филягина, М.В.Чеснокова — калган. Һәлакәт вакытында аларның беренчесе машина мае, солярка белән агуланган булган.

Бүген ТР Министрлар Кабинетында барган брифингта шул хакта хәбәр булды. ТР Премьер-министры Илдар Халиков, ул фаҗигадән исән калып, медицина ярдәме таләп ителгән барлык кешегә дә медцина ярдәме бернинди тоткарлыксыз күрсәтелә, дип басым ясап әйтте. «Булгария» экипажы да, пассажирлар да, ни үкенеч, иминиятләштерелмәгән булган, диде Хөкүмәт башлыгы журналистларның соравына җавабында. «Татар-Информ» МА