Сәхәбәләр җирләнгән урында мемориаль истәлек билгесе куелды

Болгар җирлегендә тантаналы чара кысаларында сәхәбәләр (Мөхәммәд пәйгамбәрнең фикердәшләре, аны якыннан күреп-белгән затлар) җирләнгән урында мемориаль истәлек билгесе куелды. Бу тантанада ТР Президенты Рөстәм Миңнеханов, ТР Дәүләт киңәшчесе, республиканың Тарих һәм мәдәният һәйкәлләрен торгызу буенча фондның попечительләр рәисе Минтимер Шәймиев, ТР Дәүләт Советы Рәисе Фәрит Мөхәммәтшин, ТР Премьер-министры Илдар Халиков, Согуд Гарәбстаны Корольлеге Ислам конференциясе оешмасы каршындагы Россия Федерациясе Даими вәкиле Камил Исхаков, Россия мөселманнарынң Диния нәзарәте рәисе Тәлгать хәзрәт Таҗетдин, Россия мөфтиләре шурасы рәисе Равил Гайнетдин, Украина, Румыния дин әһелләре катнашты.

Тарихи чыганаклар буенча бу сәхәбәләр Болгар җирлегендәге кече манарадан ерак түгел күмелгән дип санала.

ТР Президенты каршындагы Дәүләт торак фонды башкаручы директоры Тәлгать Абдуллин мөселманнарга мөрәҗәгать итеп, үзебезнең тарихи тамырларга кайту белән котлады. Татарстан мөфтияте рәисе Илдус хәзрәт Фәиз истәлек билгесе куелган урынның изгелер күмелгән җир, монда ел саен халыкның дога колып кайта торган урын икәнлеген билгеләп үтте. Биредәге төрбәдә сәхәбәләр аша ислам динен кабул иткән табигыйннәрнең җирләнүен әйтте. Илдус хәзрәт Коръән укып, алар рухына дога кылды.

Истәлек билгесен Рөстәм Габбасов җитәкчелегендәге скульпторлар төркеме эшләгән. Һәйкәл ТР Дәүләт киңәшчесе тарафыннан расланган эскиз проекты буенча куелган, дип яза «Татар-Информ» МА. Әлеге монумент сигез кырлы плитәгә нигезләнгән, берсенә арка корылган. Аркага татар, рус, инглиз һәм гарәп телләрендә Болгарга ислам динен таратырга килгән өч сәхәбә исеме язылган. Сигез кырлы плитә өстенә мөселман каберләренә куелган таш кебек истәлек билгесе урнаштырылган. Ул чалма, таяк һәм каләмнән гыйбарәт. Бу өч предметның сәхәбәләр Болгарга Мөхәммәт пәйгамбәрдән бүләк итеп алып киленгән дип санала.