Татарча аралашуны популярлаштырабыз!

2011 елның 26 апрелендә «Мин татарча сөйләшәм!» акциясе узачак. Быел ул берничә чараны үз эченә ала: ТР мәктәп, урта һәм югары уку йортлары арасындагы бәйге, «Интернет татарча сөйләшә!», автохәрәкәт, «Татар-дозор» маҗара уены һәм Бауман урамындагы концерт.

«Интернет татарча сөйләшә!» акциясе 20-26 апрельдә узачак һәм ул дөнья челтәре белән актив кулланучылар тарафыннан оештырыла. Акциянең максаты — кулланучылар арасында Интернетта татарча аралашуны популярлаштыру. Киләчәкне Интернетсыз күзаллап булмый, без татарларны аралашуның яңа ысулларын үзләштерү белән беррәттән, туган телне дә онытмаска өндибез. 20-26 апрельдә һәрбер кеше акциягә кушыла ала, Интернетта татарча язарга, аралашырга чакырабыз.

«Мин татарча сөйләшәм!» автохәрәкәте 25 апрельдә узачак. Акциянең рәсми логотиплары төшерелгән байраклар белән бизәлгән машиналар колоннасы Казан урамнары буйлап үтәчәк. 23 апрель «Татар-дозор» маҗара уенында 6-10 кешелек берничә команда катнашачак. Ике сәгать эчендә алар берничә биремне үтәргә тиеш булачак. Иң яхшы командаларга кыйммәтле бүләкләр тапшырылыр дип көтелә.

«Татар-дозор»да җиңүчеләр акциянең төп өлешендә игълан ителәчәк. Ул, гадәттәгечә, 26 апрельдә, Габдулла Тукай туган көнендә узачак. Университет һәм Бауман урамнары кисешкән урында 15.00 сәгатьтә яңа агым музыкасы вәкилләре, яшь шагыйрьләр чыгыш ясаячак, төрле бәйгеләр оештырылачак, «Синең беренче 150 татар сүзең» сүзлекләре, акция логотиплары төшерелгән футболкалар, түштамгалар тарату һ.б. булачак.

intertat.ru хәбәр иткәнчә, татар теле, мәдәнияте киләчәгенә битараф булмаучыларның барысын да акция чараларында актив катнашырга чакырабыз. Бары тик үз көчебез белән генә туган телебезне саклап кала алабыз, милләтебезнең бүгенге торышы гына түгел, аның киләчәге дә безгә бәйле. Кыскасы, «Без татарча сөйләшәбез!»