«Инфо-Ислам» сайтына керүчеләр Казан шәһәрен Россиядә «мөселманнар каласы» дип саный

«Инфо-Ислам» мәгълүмат агентлыгы сайтына керүчеләр арасында «Россиядә мөселманнар башкаласы итеп кайсы шәһәрне сайлыйсыз?» дигән сораштыру үткәрелде. Тәкъдим иткән шәһәрләрдән Казан 70% тавыш алды, аннан соң 13% белән Грозный шәһәре китә, 5,5% ниндидер башка шәһәр дигән җавапны сайлады, 5% Мәскәү дип уйлый, 4,5% Уфа шәһәре һәм 2% Түбән Новгород шәһәрен сайлады.

Билгеләп үтик, әлеге чара социологик тикшеренү түгел, ә бары тик сайтка керүчеләр арасында үткәрелгән сораштыру гына. Сайт статистикасыннан күренгәнчә, Мәскәүдән һәм Казаннан бер үк күләмдә диярлек кулланучы керә. Бу игътибарга лаек.

Үз чиратында, редакция «Мөселманнар каласы» дип динне тотырга максималь рәвештә уңайлыклар булган шәһәр саналырга тиеш дип саный. Ягъни, киңәйтелгән инфраструктура — мәчетләрдән алып, хәләл ашханә һәм рестораннарга кадәр, мөселман фирмалары, мөселман хатын-кызларына һәм ир-атларына эш урыннары булуны таләп итәдер.