Гарәплеләр безнең ил җитештергән хәләл тавык итен кулланачак

(Казан, "Татар ислам", Рузилә Гәрәева). Россиядәге тавык ите эшләп чыгаручы «Оптифуд» төркеме 2011 елның азагына тиклем үзенең продукциясен Мисыр һәм Берләшкән Гарәп Әмирлекләре (БГӘ) базарына чыгарырга ниятли.

Гарәп базарының үзенә генә хас булган нечкәлекләре белән компания җитәкчеләре март аенда Әмирлекләрдә булып узган GulfFood дип аталган азык-төлек күргәзмәсендә танышып кайтканнар.

Шунысын да әйтеп үтәргә кирәк, бу илдә АКШтан кертелгән ит бөтенләй юк дисәң дә була, чөнки җирле халык бу илне бик яратып бетерми, ә менә Бразилия ит җитештерү компанияләренең продукцияләре халыкны тәэмин итеп тора булса кирәк. Гарәпләргә мондый бәйләнеш бик үк килешеп тә бетми ахрысы, шунлыктан алар төрле тәэмин итеп торучы компанияләрне эзли.

Чит ил базарларына чыгу ниятеннән «Оптифуд» компаниясе яңа бренд теркәргә җыена, әлегә халыкара регистрациясе булмаганлыктан, аның исеме сер булып саклана.

Җәй урталарында «Оптифуд»ка кунакка Мисыр һәм Берләшкән Гарәп Әмирлекләреннән дистрибьютерлар киләчәк. Алар компания җитештергән ризыклар хәләл стандартларына туры киләме, юкмы, шуны тикшерәчәк.

Гарәп базары таләпләренә компания вәкилләре алдан ук хәзерләнеп куйды. 2010 елда компания «Наджма» дип аталган хәләл брендын теркәде.Бу хәләл азыкка Россиядә дә ихтыяҗ зур булды, шул исәптән чыгып, алар хәләл ит җитештерүне барлык күләм белән чагыштырганда 17 % арттырмакчы булалар.

Кунаклар килүе белән бәйле булган мәшәкатьләр, әгәр дә «Оптифуд» ширкәте гарәп базарына чыга ала икән, кире кайтарылачак. Гарәпләр гореф-гадәтләр буенча тавык итен күп ашый, ә үзләре кош асрау белән шөгыльләнми. БГӘ кешесе елына 64, 8 килограмм тавык ите ашый икән, ә Россия кешесе нибары 25 килограмм гына дип яза "Коммерсант".